பலரின் வீடுகளில் கரையான்கள் ஒரு பெரிய பிரச்சனையாக உள்ளது. அவை மரப்பொருட்களை மட்டுமின்றி சுவர்களிலும் நீண்ட கோடுகளை உருவாக்கி, வீட்டின் அழகை கெடுக்கின்றன. மர அலமாரிகள், ஜன்னல்கள், கதவுகள் உள்ளிட்ட இடங்களில் விரைவாக பரவி, அவற்றை முற்றிலும் சேதப்படுத்தும் தன்மை கொண்டவை.
கரையான்கள் சுவரில் தோன்றும் போதே உடனடியாக நடவடிக்கை எடுப்பது முக்கியம். முதலில், ஒரு ஸ்ப்ரே பாட்டிலில் உப்பு நீரை நிரப்பி, பாதிக்கப்பட்ட பகுதிகளில் தினமும் தெளிக்கலாம். இது கரையான்களின் வளர்ச்சியைத் தடுக்கிறது. மேலும், வேப்ப எண்ணெய் இரண்டு டீஸ்பூன் மற்றும் தண்ணீர் கலந்து தெளிப்பதும் பயனுள்ளதாக இருக்கும், ஏனெனில் வேம்பின் வாசம் கரையான்களுக்கு பிடிக்காது.
இதேபோல், பாதி பாட்டிலில் தண்ணீர் நிரப்பி 2–3 டீஸ்பூன் வினிகர் சேர்த்து கலக்கவும். அதை சுவரில் தெளித்தால் கரையான்களை அழிக்க உதவும். இவை அனைத்தும் இயற்கையான முறைகள் என்பதால், வீட்டு சூழலுக்கும் பாதுகாப்பானவை.
கரையான்கள் அதிக அளவில் பரவி விட்டால், சந்தையில் கிடைக்கும் கரையான் கொல்லி மருந்துகளையும் பயன்படுத்தலாம். ஆனால், இவை சில நாட்களுக்கு மட்டுமே பயன் அளிக்கக்கூடும்; பின்னர் மீண்டும் பரவும் அபாயம் உண்டு. மிகக் கடுமையான நிலைகளில், தொழில்முறை பூச்சிக்கொல்லி நிபுணர்களை அழைப்பதே சிறந்த தீர்வாகும். சரியான பராமரிப்பு மற்றும் தடுப்பு முறைகள் மூலம், கரையான்களை நிரந்தரமாகக் கட்டுப்படுத்தலாம்.
