நடிகர் காளி வெங்கட் இன்று பலரின் மனதில் இடம் பிடித்தவர். எந்த கதாபாத்திரம் கொடுத்தாலும் அதில் உயிரோடு நடித்துவிடும் திறமை அவருக்கு உண்டு. ஆனால், சினிமாவில் புகழ் பெறும் முன் அவர் அனுபவித்த கஷ்டங்கள் மிகுந்தவை.
தூத்துக்குடி மாவட்டம் கோவில்பட்டியை சேர்ந்த காளி வெங்கட், சினிமா மீது கொண்ட ஆசையால் 2008ஆம் ஆண்டு சென்னைக்கு வந்து வாய்ப்பு தேடினார். பல நிறுவனங்களில் சுற்றி அலைந்த அவர், 2010ஆம் ஆண்டு அகம்புறம் திரைப்படத்தில் சிறிய கதாபாத்திரம் மூலம் திரையில் அறிமுகமானார்.
அதன் பின் முண்டாசுப்பட்டி மற்றும் தெகிடி போன்ற படங்களில் அவரது திறமை வெளிப்பட்டது. தொடர்ந்து மௌனகுரு, மிருதன், வாயை மூடி பேசவும், மத யானை கூட்டம் போன்ற படங்களில் சிறந்த நடிப்பை வெளிப்படுத்தினார். ராட்சசன் படத்தில் விஷ்ணுவிஷாலின் நண்பராகவும், கார்கி படத்தில் வழக்கறிஞராகவும் நடித்தது அவருக்கு தனிப்பட்ட பெயரை பெற்றுத் தந்தது.
அண்மையில் அவர் நடித்த மெட்ராஸ் மேட்னி திரைப்படம் ரசிகர்களிடையே நல்ல வரவேற்பைப் பெற்றது. இந்த படத்தின் வெற்றி விழாவில் பேசுகையில், அந்த கதை தந்தை-மகன் உணர்ச்சியை நினைவூட்டியது என்றும், அது தனது தந்தையின் நினைவுகளை மீண்டும் உயிர்ப்பித்ததாகவும் கூறினார்.
சினிமாவிற்கு வருவதற்கு முன் காளி வெங்கட் காய்கறி வியாபாரம் செய்தார். ஒரு நாள் வெங்காயம் நிறைந்த தள்ளுவண்டி சாலையில் கவிழ்ந்த சம்பவம் இன்னும் அவருக்கு மறக்க முடியாத நினைவாக உள்ளது. சாலையில் விழுந்த வெங்காயத்தை பொறுக்கி மீண்டும் வண்டியில் ஏற்றிய வேதனை அவரை இன்று வரை பின்தொடர்கிறது.
“நான் பட்ட கஷ்டத்தை யாரும் அனுபவிக்கக் கூடாது” என அவர் கூறிய வார்த்தைகள், அவரின் வாழ்க்கைப் போராட்டத்தை வெளிப்படுத்துகின்றன.
இன்று காளி வெங்கட், தனது உழைப்பாலும் திறமையாலும் தமிழ் சினிமாவில் முக்கியமான நடிகராக உயர்ந்துள்ளார். அவரது வாழ்க்கை, கஷ்டப்பட்டாலே வெற்றி வரும் என்ற உண்மையை மீண்டும் நிரூபிக்கிறது.
