ஐசிஎஃப் ஆலையில் தயாரிக்கப்பட்ட நாட்டின் முதல் ஹைட்ரஜன் ரயில் நேற்று சென்னையில் இருந்து ஹரியானாவிற்கு கொண்டு செல்லப்பட்டது. இந்த ரயில் அடுத்த சில மாதங்களில் பல்வேறு கட்ட சோதனைகளுக்கு உட்படும். உலகப் புகழ்பெற்ற ரயில் பெட்டி உற்பத்தி தொழிற்சாலையான சென்னை ஐசிஎஃப் ஆலை, வந்தே பாரத் ரயில்கள், எல்ஹெச்பி பெட்டிகள், மெட்ரோ ரயில்கள் மற்றும் அம்ரித் பாரத் ரயில்கள் உள்ளிட்ட பல்வேறு ரயில்களை உற்பத்தி செய்கிறது.
இதற்கிடையில், நாட்டின் முதல் ஹைட்ரஜன் ரயில் இங்கு ரூ. 118 கோடி செலவில் தயாரிக்கப்பட்டது. இந்த ரயில் நீராவியை மட்டுமே வெளியிடுவதால், சுற்றுச்சூழலுக்கு தீங்கு விளைவிக்காது. இது மின்சார ரயிலை விட சுற்றுச்சூழலுக்கு உகந்தது. தற்போது முக்கிய நகரங்களிலிருந்து குறுகிய தூரத்திற்கு மட்டுமே இயக்க திட்டமிடப்பட்டுள்ளது. அதிகபட்சமாக 50 முதல் 80 கி.மீ. தூரம் வரை மட்டுமே இயக்கப்படும்.
இந்த ரயிலில் 10 பெட்டிகள் இருக்கும். ஒவ்வொரு பெட்டியிலும் 84 பேர் பயணிக்க முடியும். இந்த ரயில் எஞ்சின் 1,200 குதிரைத்திறன் கொண்டதாகவும், அதிகபட்சமாக மணிக்கு 110 கி.மீ வேகத்தில் பயணிக்கக்கூடியதாகவும் உள்ளது. இந்நிலையில், இந்த ரயில் மற்றொரு எஞ்சினுடன் இணைக்கப்பட்டு நேற்று அதிகாலை சென்னையில் இருந்து ஹரியானாவுக்கு கொண்டு செல்லப்பட்டது.
இது குறித்து ஐசிஎஃப் அதிகாரிகள் கூறியதாவது:- ரயில்வே வாரியத்தின் உத்தரவுப்படி, பல்வேறு கட்ட சோதனைகள் நடத்தப்படும். சோதனை இறுதி செய்யப்பட்ட பிறகு, ரயில்வே பாதுகாப்பு ஆணையத்தின் ஒப்புதல் பெறப்படும். பின்னர், சில வாரங்களுக்கு சோனிபட் மற்றும் ஹரியானாவின் ஜிந்த் இடையே ஒரே ஒரு ரயில் மட்டுமே இயக்கப்படும். பயணிகளின் பாதுகாப்பை உறுதி செய்த பிறகு இந்த ரயில் இயக்கம் பயணிகளின் சேவைக்கு கொண்டு வரப்படும். இவ்வாறு அவர்கள் கூறினர்.
