பகல்பூர்: 1956-ம் ஆண்டு பாகிஸ்தானில் இருந்து இந்தியா வந்த 2 பாகிஸ்தானிய பெண்களுக்கு வாக்காளர் அடையாள அட்டைகள் வழங்கப்பட்டுள்ளன. மேலும், பீகாரில் சமீபத்தில் தீவிர வாக்காளர் பதிவு நடவடிக்கையின் போது, அவர்களின் வாக்காளர் அடையாள அட்டைகள் சரிபார்க்கப்பட்டன. மத்திய உள்துறை அமைச்சகத்தின் அறிவுறுத்தலின் பேரில் நடத்தப்பட்ட விசாரணையில் அவர்கள் பாகிஸ்தானியர்கள் என்பது தெரியவந்தது.
மேலும், அவர்கள் இப்போது வயதானவர்கள் என்பதால், தீவிர வாக்காளர் பதிவு செயல்பாட்டின் போது சரியான தகவல்களை வழங்க முடியவில்லை என்று கூறப்படுகிறது. இதைத் தொடர்ந்து, அரசாங்கம் அவர்களின் பெயர்களை வாக்காளர் பதிவு பட்டியலில் இருந்து நீக்க வேண்டியிருந்தது. இது குறித்து பேசிய பாகல்பூர் மாவட்ட நீதிபதி நேவல் கிஷோர் சவுத்ரி, “மத்திய உள்துறை அமைச்சகத்திடமிருந்து பெறப்பட்ட சில தகவல்களைச் சரிபார்த்த பிறகு, அவர்கள் இருவரும் பாகிஸ்தானியர்கள் என்பது உறுதி செய்யப்பட்டது.
அதன் பிறகு, வாக்காளர் பட்டியலில் இருந்து அவர்களின் பெயர்களை நீக்க நடவடிக்கை எடுக்கப்பட்டது,” என்று அவர் கூறினார். பீகாரில் உள்ள பகல்பூர் மாவட்டத்தின் டேங்க் லேன் பகுதியைச் சேர்ந்த அப்துல் ஹசனின் மனைவி இம்ரானா கானம் (எ) இம்ரானா கதுன் மற்றும் முகமது தப்ஜீல் அகமதுவின் மனைவி ஃபிர்தோசியா கானம் ஆகியோரின் பெயர்களில் வாக்காளர் அட்டைகள் பெறப்பட்டுள்ளன.
இந்த இரண்டு பெண்களில் ஒருவர் 1956-ம் ஆண்டு பாகிஸ்தானில் இருந்து 3 மாத விசாவிலும், மற்றொருவர் 3 வருட விசாவிலும் இந்தியாவிற்கு வந்தனர். அவர்கள் இருவருக்கும் இப்போது நோட்டீஸ் அனுப்பப்பட்டுள்ளது.
