சத்தீஸ்கர் மாநிலம் கரியாபான்ட் மாவட்ட வனப்பகுதியில் பாதுகாப்பு படையினர் நடத்திய பெரிய தேடுதல் வேட்டையில் துப்பாக்கிச்சண்டை வெடித்தது. சி.பி.ஐ. மாவோயிஸ்ட் அமைப்பின் மத்திய குழு உறுப்பினரும் மூத்த தலைவருமான மோடம் பாலகிருஷ்ணா உள்ளிட்டோர் போலீசாரை நோக்கி துப்பாக்கியால் தாக்கினர். பதிலடி கொடுத்த பாதுகாப்பு படையினர் நடத்திய சூட்டில் பாலகிருஷ்ணா உட்பட 10 நக்சல்கள் உயிரிழந்தனர்.
இந்த நடவடிக்கையில் சிறப்பு அதிரடிப்படை போலீசார், மத்திய ரிசர்வ் போலீஸ் படையின் கோப்ரா பிரிவு மற்றும் உள்ளூர் போலீசார் இணைந்து பங்கேற்றனர். 1980களிலிருந்து நக்சல் இயக்கத்தில் தீவிரமாக செயல்பட்ட பாலகிருஷ்ணா, ஒடிஷா மாநில மாவோயிஸ்ட் குழு செயலராக இருந்தவர் என்பது குறிப்பிடத்தக்கது. அவரது மரணம் நக்சல் இயக்கத்திற்கு பெரும் அதிர்ச்சியை ஏற்படுத்தியுள்ளது.
போலீஸ் தரப்பில் கிடைத்த தகவலின்படி, இந்த ஆண்டு மட்டும் சத்தீஸ்கரில் பல்வேறு என்கவுன்டர்களில் 241 நக்சல்கள் கொல்லப்பட்டுள்ளனர். இதில் பஸ்தான் டிவிசனில் மட்டும் 212 பேர் பலியாகியுள்ளனர். இது நக்சல் இயக்கத்தின் வலிமையை குறைக்கும் முக்கிய முன்னேற்றமாக பாதுகாப்பு படையினர் கருதுகின்றனர்.
சமீப காலங்களில் சத்தீஸ்கரில் அடிக்கடி நடைபெறும் என்கவுன்டர்கள், மாநிலத்தின் பாதுகாப்பு நிலையை சீராக்கும் வகையில் முக்கிய பங்காற்றுகின்றன. ஆனால் அதேசமயம், நக்சல் தாக்குதலால் பொதுமக்கள் பாதுகாப்பு மற்றும் அமைதி குறித்த அச்சம் இன்னும் நீங்கவில்லை. மத்திய மற்றும் மாநில பாதுகாப்பு படைகள் இணைந்து தொடர்ந்து நடவடிக்கை எடுத்து வருவதால், வருங்காலங்களில் இந்த வன்முறை குறையும் என நம்பப்படுகிறது.
