சென்னை நகரத்தைச் சேர்ந்த அதிகாரிகள் தெரிவித்ததாவது, கலைஞர் மகளிர் உரிமைத் தொகை திட்டத்தில் விண்ணப்பித்தவர்களுக்கு நேரடி கள ஆய்வு தொடங்கியுள்ளது. விண்ணப்பித்தவர்களின் விலாசம், வங்கி விவரங்கள் மற்றும் கொடுத்த தகவல்கள் உண்மையா என்பதை சரிபார்க்கும் பணி நடைபெற்று வருகிறது. இத்திட்டம் விரிவாக்கம் செய்யப்பட்டுள்ளதால், புதிய பயனாளிகளின் விவரங்கள் உறுதிப்படுத்தப்பட்ட பிறகு மட்டுமே இறுதி முடிவு அறிவிக்கப்படும்.
தீபாவளிக்கு முன்பாகவே முதல்பட்டியல் வெளியிடப்படும் என எதிர்பார்க்கப்படுகிறது. “உங்களுடன் ஸ்டாலின்” திட்டத்தின் கீழ் பெறப்பட்ட விண்ணப்பங்கள் படிப்படியாக பரிசீலிக்கப்படுகின்றன. அக்டோபர் 15ஆம் தேதி முதல் கட்டமாக நிதி வழங்கப்படலாம் என்ற தகவலும் வெளியாகியுள்ளது. முதல் நாள் மற்றும் ஆரம்ப வாரத்தில் மனு அளித்தவர்கள் அக்டோபர் மாதத்திலேயே பதில்களைப் பெறுவார்கள் என கூறப்படுகிறது.
இந்நிலையில், காஞ்சிபுரத்தில் நடைபெற்ற அரசு நலத்திட்ட உதவி வழங்கும் விழாவில் துணை முதலமைச்சர் உதயநிதி ஸ்டாலின் கலந்து கொண்டார். அங்கு 4997 பயனாளிகளுக்கு ரூ.253 கோடி மதிப்பிலான உதவிகள் வழங்கப்பட்டன. மேலும், 3846 பேருக்கு வீட்டு மனைப் பட்டா, புதிய கட்டிடங்கள், மற்றும் பல நலத்திட்டங்கள் தொடங்கப்பட்டன. அவர் உரையாற்றியபோது, திமுக அரசின் சமூகநீதி கொள்கைகளை வலியுறுத்தினார்.
மகளிர் உரிமைத் தொகை திட்டம், மகப்பேறு நிதி உதவி, காலை உணவு திட்டம் போன்றவை பெரும் சாதனையாக உள்ளன என்று உதயநிதி குறிப்பிட்டார். இத்திட்டத்தின் மூலம் மாநிலம் முழுவதும் கோடிக்கணக்கான பெண்கள் பயன் பெறுகின்றனர். காஞ்சிபுரம் மாவட்டத்தில் மட்டும் 1.73 லட்சம் பெண்கள் பயனடைந்து வருவதாகவும் அவர் தெரிவித்தார். விரைவில் முதலமைச்சர் ஸ்டாலின் கவனத்திற்கு கொண்டு சென்று, அனைவருக்கும் உரிமைத் தொகை வழங்கப்படும் என்ற உறுதியையும் அளித்தார்.
