சென்னை: மத்திய பிரதேச மாநிலத்தில் கோல்ட்ரிஃப் சிரப் மருந்து காரணமாக 14 குழந்தைகள் உயிரிழந்த சம்பவம் இந்தியா முழுவதும் அதிர்ச்சியை ஏற்படுத்தியுள்ளது. இதையடுத்து, தமிழ்நாடு சுகாதாரத்துறை அமைச்சர் மா.சுப்பிரமணியன், தமிழகத்தில் முறையான நடவடிக்கைகள் மேற்கொள்ளப்பட்டதால் எவ்வித அச்சமும் இல்லையென தெரிவித்துள்ளார்.
அக்கருத்தில், 01 அக்டோபர் 2025 அன்று மத்திய மருந்து கட்டுப்பாடு துறையிடம் இருந்து அவசரக் கடிதம் வந்தது. சிந்த்வாரா மாவட்டத்தில் ஏற்பட்ட குழந்தைகள் மரணத்திற்கு தொடர்புடைய மருந்து ஸ்ரீசன் பார்மசியூட்டிக்ஸ் தயாரித்த கோல்ட்ரிஃப் சிரப் குறித்து உடனடியாக ஆய்வு செய்யுமாறு கேட்டுக்கொள்ளப்பட்டது. அந்த ஆய்வில், டைதிலீன் கிளைகால் (Diethylene Glycol, DEG) என்ற உயிர்க்கொல்லி வேதிப்பொருள் 48.6% அளவில் இருப்பதாக கண்டறியப்பட்டது.
இதன் பின்னர் தமிழ்நாடு முழுவதும் கோல்ட்ரிஃப் சிரப் விற்பனையை தடை செய்யும் உத்தரவு பிறப்பிக்கப்பட்டது. ஸ்ரீசன் பார்மசியூட்டிக்ஸ் நிறுவனத்தில் புலனாய்வு நடத்தி, சந்தையில் உள்ள மருந்துகளை சேகரித்து அரசு ஆய்வுக் கூடத்திற்கு அனுப்பியுள்ளனர். மேலும், அந்த நிறுவனம் உடனடியாக மருந்து உற்பத்தியை நிறுத்தி மூடப்பட்டது. அவர்களின் மருந்து உரிமங்களை முழுமையாக ரத்து செய்யும் நடவடிக்கையும் எடுக்கப்பட்டுள்ளது.
மத்திய மற்றும் மாநில மருந்து கட்டுப்பாட்டு துறைகள் இணைந்து, 48 மணி நேரத்தில் துரிதமான நடவடிக்கை மேற்கொண்டு பொதுமக்கள் பாதுகாப்பை உறுதி செய்துள்ளதாக அமைச்சர் குறிப்பிட்டார். தமிழக அரசு மக்களுக்கு முன்னதாக அறிவித்ததுபோல், கோல்ட்ரிஃப் சிரப் சம்பந்தமான எந்த உயிரிழப்பும் இனி ஏற்படாதவாறு முழு நடவடிக்கைகள் மேற்கொள்ளப்பட்டுள்ளன.
