ஒட்டாவா: கனடாவின் ஆல்பர்ட்டா மாகாணத்தில் அமைந்துள்ள ராணுவ முகாமில் ஏற்பட்ட வெடிப்பு மற்றும் தீ விபத்து பெரும் அதிர்ச்சியை ஏற்படுத்தியுள்ளது. இந்தச் சம்பவத்தில் பலர் உயிரிழந்ததாகவும், ஏராளமானோர் காயமடைந்ததுள்ளனர். இருப்பினும், உயிரிழந்தவர்களின் துல்லியமான எண்ணிக்கை அதிகாரப்பூர்வமாக உறுதிப்படுத்தப்படவில்லை.
எட்மண்டன் நகருக்குத் தென்கிழக்கே சுமார் 180 கிலோமீட்டர் தொலைவில் உள்ள வெயின்ரைட் பகுதியில் இந்த ராணுவ முகாம் அமைந்துள்ளது. அங்கு ஏற்பட்ட வெடிப்பைத் தொடர்ந்து தீ வேகமாகப் பரவியதாகக் கூறப்படுகிறது. பலத்த காற்று வீசியதால் தீயைக் கட்டுப்படுத்துவதில் மீட்புப் படையினருக்குச் சிரமம் ஏற்பட்டதாகவும் தகவல்கள் வெளியாகின.
விபத்தில் பாதிக்கப்பட்டவர்களின் எண்ணிக்கை அதிகமாக இருந்ததால், அருகிலுள்ள மருத்துவமனைகளில் அவசரகால நடவடிக்கைகள் மேற்கொள்ளப்பட்டன. எட்மண்டனில் உள்ள ராயல் அலெக்ஸாண்ட்ரா மருத்துவமனையில் நோயாளிகளின் வருகை அதிகரித்ததைத் தொடர்ந்து, அதிக எண்ணிக்கையிலான அவசரச் சிகிச்சை நோயாளிகளைக் கையாளும் நடைமுறை அமல்படுத்தப்பட்டதாகச் செய்தி தெரிவிக்கிறது.
இந்தச் சம்பவம் குறித்து கனடா பிரதமர் மார்க் கார்னி கவலை தெரிவித்துள்ளார். பாதுகாப்புத் துறை அமைச்சர் டேவிட் மெக்கின்டி உள்ளிட்ட தலைவர்களும் பாதிக்கப்பட்ட ராணுவப் பணியாளர்கள் மற்றும் அவர்களது குடும்பத்தினருக்கு ஆதரவு தெரிவித்துள்ளனர்.
விபத்து ஏற்பட்ட பகுதிக்கு அருகே நடைபெற்ற வாக்குப்பதிவு நடவடிக்கைகளும் பாதுகாப்பு காரணங்களுக்காகத் தற்காலிகமாக நிறுத்தப்பட்டதாகக் கூறப்படுகிறது. தீயைக் கட்டுப்படுத்தவும் பாதிக்கப்பட்டவர்களை மீட்கவும் அவசரகாலக் குழுக்கள் தொடர்ந்து பணியாற்றின.
வெடிப்பு ஏற்பட்டதற்கான துல்லியமான காரணம் குறித்துப் பாதுகாப்புத் துறை மற்றும் காவல்துறை விசாரணை மேற்கொண்டதாகச் செய்தியில் குறிப்பிடப்பட்டுள்ளது. ஆயுதங்கள் அல்லது வெடிபொருட்கள் தொடர்பான விபத்தா, தொழில்நுட்பக் கோளாறா என்பது விசாரணைக்குப் பின்னரே தெரியவரும்.
