துபாய்: 3-வது ஐசிசி உலக டெஸ்ட் சாம்பியன்ஷிப் 2025 இறுதிப் போட்டி ஜூன் 11 முதல் 15 வரை லண்டன் லார்ட்ஸ் மைதானத்தில் நடைபெறும் என அறிவிக்கப்பட்டுள்ளது.
ஜூன் 16-ம் தேதி ரிசர்வ் நாளாகவும் அறிவிக்கப்பட்டுள்ளது. ஐசிசி டெஸ்ட் சாம்பியன்ஷிப் இறுதிப் போட்டி லார்ட்ஸ் மைதானத்தில் நடைபெறுவது இதுவே முதல் முறை. டெஸ்ட் சாம்பியன்ஷிப் இறுதிப் போட்டி 2021-ல் சவுத்தாம்ப்டனிலும், 2023-ல் தி ஓவலிலும் நடைபெற்றது.
இந்த இரண்டு இறுதிப் போட்டிகளிலும் இந்திய அணி விளையாடியது. இதில் இந்திய அணி நியூசிலாந்து மற்றும் ஆஸ்திரேலியாவிடம் தோல்வியடைந்து பட்டம் வெல்லும் வாய்ப்பை இழந்தது.
இந்த முறை ஐசிசி டெஸ்ட் சாம்பியன்ஷிப் புள்ளிகள் பட்டியலில் ரோஹித் சர்மா தலைமையிலான இந்திய அணி தற்போது முதலிடத்தில் உள்ளது. இந்த ஆண்டு இறுதியில் இந்திய அணி ஆஸ்திரேலியாவில் சுற்றுப்பயணம் செய்து 5 டெஸ்ட் போட்டிகள் கொண்ட தொடரில் விளையாட உள்ளது.
ஐசிசி டெஸ்ட் சாம்பியன்ஷிப்பின் இறுதிப் போட்டிக்கு முன்னேறும் இரு அணிகளுக்கும் இந்தத் தொடர் முக்கியமானதாகக் கருதப்படுகிறது.
