சென்னை: செஸ் ஒலிம்பியாட் போட்டியில் தங்கப் பதக்கம் வென்று நாடு திரும்பிய வீரர்களுக்கு சென்னை விமான நிலையத்தில் உற்சாக வரவேற்பு அளிக்கப்பட்டது.
ஹங்கேரியின் புடாபெஸ்டில் நடைபெற்ற 45-வது செஸ் ஒலிம்பியாட் போட்டியில் இந்திய ஆண்கள் மற்றும் பெண்கள் அணி முதல்முறையாக தங்கப் பதக்கம் வென்று வரலாறு படைத்தது.
ஆண்கள் அணியில் இடம்பெற்றிருந்த ஆர்.பிரக்ஞானந்தா, மகளிர் அணியில் இடம்பெற்றிருந்த அவரது சகோதரி ஆர்.வைஷாலி, இந்திய அணித் தலைவர் ஸ்ரீநாத் ஆகியோர் ஹங்கேரியில் இருந்து செவ்வாய்க்கிழமை நள்ளிரவு 12.20 மணியளவில் சென்னை திரும்பியுள்ளனர்.
சென்னை விமான நிலையத்தில் அவர்களுக்கு தமிழ்நாடு விளையாட்டு மேம்பாட்டு ஆணையம் சார்பில் உற்சாக வரவேற்பு அளிக்கப்பட்டது. வைஷாலி கூறும்போது, “சென்னையில் நடந்த கடந்த செஸ் ஒலிம்பியாட் போட்டியில் வெண்கலப் பதக்கம் வென்றிருந்த எங்களால் தங்கப் பதக்கம் வெல்ல முடியாமல் போனது மிகவும் வருத்தமாக இருந்தது.
ஆனால் தற்போது தங்கப் பதக்கம் வென்றிருப்பது மிகுந்த மகிழ்ச்சி அளிக்கிறது. இரண்டு போட்டிகளிலும் வெற்றி பெற்றிருக்க வேண்டிய நேரத்தில், இரண்டு போட்டிகளிலும் வெற்றி பெற்று பதக்கம் வென்றுள்ளோம்,” என்றார்.
இவர்கள் இருவருக்கும் பிறகு இந்திய ஆடவர் அணியில் முக்கிய பங்காற்றிய குகேஷ் காலை 8.15 மணிக்கு சென்னை வந்தார். அவருக்கும் உற்சாக வரவேற்பு அளிக்கப்பட்டது. குகேஷ் கூறும்போது, “நடப்பு உலக சாம்பியனான சீனாவைச் சேர்ந்த டிங் லிரென் என்னுடன் விளையாடுவார் என்று எதிர்பார்த்தேன். ஆனால் அவர் விளையாடவில்லை. கேப்டன் ஸ்ரீநாத் என்னை முதல் பலகையில் விளையாட வைத்து வியூகம் வகுத்தார்.
அதனால்தான் நானும் அர்ஜுன் எரிகைசியும் தொடர்ந்து வெற்றி பெற முடிந்தது. சென்னையில் நடந்த செஸ் ஒலிம்பியாட் போட்டியில் கடைசி சுற்றுக்கு முன்னேறினோம். அதை உணர்ந்துதான் இந்த முறை அமெரிக்காவுடன் வெற்றிக்காக விளையாடினோம்.
அதனால்தான் அமெரிக்கா தோற்கடிக்கப்பட்டது. இந்திய அணியின் கூட்டு முயற்சியால் இந்த தங்கப் பதக்கம் கிடைத்துள்ளது என்றார்.
