சென்னை: தமிழகத்தில் 2026-ல் சட்டசபை தேர்தல் நடைபெற உள்ளது. இருப்பினும், தற்போது தமிழக அரசியல் களம் சூடுபிடிக்க துவங்கியுள்ளது. இந்நிலையில் நடிகர் விஜய் தமிழக வெற்றி கழகம் என்ற கட்சியை தொடங்கியுள்ளார். அவர் கட்சி தொடங்கிய போது நாம் தமிழர் கட்சியின் ஒருங்கிணைப்பாளர் சீமான் அவருக்கு ஆதரவு தெரிவித்து தம்பியின் அரசியல் பயணத்திற்கு வாழ்த்து தெரிவித்தார்.
ஆனால் விஜய் நடத்திய முதல் மாநாட்டிலேயே சீமானை விமர்சித்தார். இதனால் கடுப்பான சீமான், முதலில் எதிர்த்தாலும், ஆதரிப்போம் என்று கூறிவிட்டு, மாநாடு முடிந்ததும், இனி அண்ணன் இல்லை, தம்பி இல்லை என்றும், ‘திராவிடமும் தமிழ் தேசியமும் இரு கண்கள்‘ என்று விஜய்யின் பேச்சுக்கு கடுமையான விமர்சனங்களை முன்வைத்தார்.
இதையடுத்து விஜய் ரசிகர்களும், நாம் தமிழர் கட்சியினரும் சமூக வலைதளங்களில் ஒருவரையொருவர் வார்த்தைகளால் தாக்கி வருகின்றனர். அதே சமயம் சீமானின் நாம் தமிழர் கட்சியின் பல்வேறு பகுதிகளில் பிரபலமான முகமாக இருந்த நிர்வாகிகள் அடுத்தடுத்து வெளியேறுவது சீமானுக்கு சற்று கவலையை அளித்து வருகிறது. அதுமட்டுமின்றி விஜய்யின் தமிழக வெற்றிக் கட்சியில் இணையப் போகிறார்கள் என்ற செய்தியும் சீமானுக்கு தலைவலியாக மாறியுள்ளது.
இது ஒருபுறமிருக்க, நடிகர் ரஜினிகாந்த் அரசியல் கட்சி தொடங்கப் போவதாக அறிவித்தபோது, அதற்கு நேர் எதிரான நிலைப்பாட்டை எடுத்து சீமான் கடுமையாக விமர்சித்தார். தமிழக அரசியலில் தமிழரல்லாதவர்கள் ஆட்சிக்கு வரக்கூடாது என அவர் கூறிய கருத்து அப்போது தமிழக அரசியலில் பரபரப்பை ஏற்படுத்தியது. ஓரிரு முறை மிகக் கடுமையான வார்த்தைகளால் விமர்சித்திருந்தார். அதே சமயம் ரஜினிகாந்த் அரசியலுக்கு வரப்போவதில்லை என்று அறிவித்ததும் சீமான் தனது விமர்சனத்தை நிறுத்தினார். குறிப்பாக 2022 டிசம்பரில், ரஜினிகாந்தை அரசியல் ரீதியாக விமர்சித்தபோது, கடுமையான வார்த்தைகளால் யாரையாவது புண்படுத்தியிருந்தால் வருந்துகிறேன் என்று கூட கூறியிருந்தார்.
ரஜினிகாந்தின் அரசியலை கடுமையாக விமர்சித்து வந்த சீமான், அரசியலுக்கு வர மாட்டேன் என்று கூறியவுடன் தனது நிலைப்பாட்டை முற்றிலும் மாற்றிக் கொண்டார். இந்நிலையில் சீமான் தற்போது நடிகர் ரஜினிகாந்தை திடீரென சந்தித்துள்ளார். சென்னை போயஸ் கார்டனில் உள்ள ரஜினிகாந்த் இல்லத்தில் நேற்று இரவு 8 மணியளவில் இந்த ரகசிய சந்திப்பு நடந்தது. இந்த சந்திப்பு சுமார் 40 நிமிடங்கள் நீடித்ததாக கூறப்படுகிறது. தற்போதைய அரசியல் நிலவரம் குறித்தும் இருவரும் விவாதித்ததாக கூறப்படுகிறது.
விஜய் தமிழக அரசியலுக்கு வருவதற்கு சீமான் கடும் எதிர்ப்பு தெரிவித்து வருகிறார். இந்நிலையில், சீமான் எதிர்பாராத விதமாக ரஜினிகாந்தை சந்தித்தது பரபரப்பை ஏற்படுத்தியுள்ளது. இந்த சந்திப்பில் தற்போதைய அரசியல் கட்சிகளின் செயல்பாடுகள் குறித்தும், 2026 சட்டசபை தேர்தல் குறித்தும் ஆலோசித்ததாக கூறப்படுகிறது.
