பொறியியல் கல்லூரிகளுக்கான அங்கீகாரம் நீட்டிப்பு மற்றும் புதிய படிப்புகளுக்கான அனுமதிக்கு விண்ணப்பிக்க பிப்ரவரி 2-ம் தேதி வரை கால அவகாசம் நீட்டிக்கப்பட்டுள்ளது. அகில இந்திய தொழில்நுட்பக் கல்வி கவுன்சிலின் (AICTE) கட்டுப்பாட்டின் கீழ் நாடு முழுவதும் 4,000-க்கும் மேற்பட்ட தொழில்நுட்பக் கல்லூரிகள் இயங்கி வருகின்றன. இந்த கல்லூரிகளுக்கான நடைமுறை விதிகளை AICTE வெளியிடுகிறது.
அவற்றை முறையாகப் பின்பற்றும் உயர்கல்வி நிறுவனங்களுக்கு மட்டுமே தொடர்ச்சியான அங்கீகாரத்தை நீட்டிக்க AICTE அனுமதி வழங்கும். இது தவிர, கல்லூரிகள் தங்கள் அங்கீகாரத்தை ஆண்டுதோறும் புதுப்பிக்க வேண்டும். அதன்படி, 2025-26-ம் கல்வியாண்டுக்கான பொறியியல் கல்லூரிகளுக்கு அங்கீகாரம் வழங்குவதற்கான நடைமுறைகள் கடந்த நவம்பரில் தொடங்கப்பட்டன. அதைத் தொடர்ந்து, AICTE ஆனது உயர்கல்வி நிறுவனங்களின் அங்கீகாரம், திறந்த மற்றும் ஆன்லைன் படிப்புகள், புதிய கல்லூரிகள் மற்றும் படிப்புகளுக்கு விண்ணப்பிக்க விரும்பும் விண்ணப்பங்களை அழைத்தது.
கல்லூரிகள் விண்ணப்பிக்கும் செயல்முறை மண்டல வாரியாக செய்யப்பட்டது. இதற்கிடையில் விண்ணப்ப பதிவு காலம் ஜனவரி 13-ம் தேதியுடன் முடிவடைந்தது. இந்நிலையில் பல்வேறு தரப்பினரின் கோரிக்கையை ஏற்று பிப்ரவரி 2-ம் தேதி வரை கால அவகாசம் நீட்டிக்கப்பட்டுள்ளது. இந்த வாய்ப்பை பயன்படுத்தி கல்லூரிகள் விரைந்து விண்ணப்பிக்க வேண்டும். இது தொடர்பான கூடுதல் விவரங்களை www.aicte-india.org என்ற இணையதளத்தில் பார்க்கலாம் என ஏஐசிடிஇ வெளியிட்டுள்ள செய்திக்குறிப்பில் தெரிவிக்கப்பட்டுள்ளது.
