இன்றைய காலத்தில் பல பெண்கள் வயது முதிர்ந்த பிறகு தாய்மையடைகின்றனர். இது உடல்நலமும் மனநிலையும் பாதிக்கக்கூடிய நிலையை ஏற்படுத்தும். மருத்துவ முன்னேற்றங்கள் நாற்பதுகளிலும் ஐம்பதுகளிலும் கூட தாய்மையை சாத்தியமாக்கினாலும், உடல் மற்றும் மன அழுத்தங்களை கருத்தில் கொள்ள வேண்டும். ஆராய்ச்சியின்படி, பெண்கள் 21 முதல் 30 வயது வரை குழந்தை பெறுவதற்கான சிறந்த காலமாகக் கருதப்படுகிறார்கள்.
இந்த வயதில் கருப்பை வளமாக இருக்கும், கருவுறுதல் சாத்தியமும் அதிகம். ஆனால் 30 வயதுக்குப் பிறகு கருவுறுதல் படிப்படியாகக் குறைய தொடங்குகிறது. 35 வயதிற்கு மேல் கருப்பையின் செயல்பாடு பாதிக்கப்படுவதால், கருச்சிதைவு மற்றும் பிறப்பு குறைபாடுகளுக்கு வாய்ப்பு அதிகரிக்கிறது.
மேலும், ஹார்மோன் மாற்றங்களால் கருத்தரிப்பு சிரமமாகலாம். 35 வயதுக்கு மேல் கர்ப்பம் தரிக்க நினைக்கும் பெண்கள், கருப்பை ஆரோக்கியத்தையும் முட்டை தரத்தையும் மதிப்பீடு செய்ய வேண்டும்.
டவுன் சிண்ட்ரோம் போன்ற பிறப்பு குறைபாடுகளை கண்டறிய கூடுதல் பரிசோதனைகள் தேவைப்படலாம். கர்ப்பத்தைத் திட்டமிடும் முன் இரத்த அழுத்தம், நீரிழிவு போன்ற உடல்நலப் பிரச்சனைகளை சரிசெய்வது அவசியம். தாய்மை என்பது ஒரு தனிப்பட்ட முடிவு. உடல், மனம், குடும்ப சூழ்நிலை ஆகியவற்றை கருத்தில் கொண்டு, சரியான வயதில் குழந்தை பெற்றுக் கொள்வது தாய் மற்றும் குழந்தையின் நலனுக்காக அவசியம்.
