தட்டச்சு, சுருக்கெழுத்து விண்ணப்பத்தில் உள்ள பிழைகளை அபராதத்துடன் திருத்தம்..!!

சென்னை: தட்டச்சு, சுருக்கெழுத்து உள்ளிட்ட வணிகவியல் தேர்வுகளுக்கு விண்ணப்பித்தவர்கள் விண்ணப்பத்தில் ஏதேனும் பிழை இருந்தால், அபராதம் செலுத்தி இன்று மாலை 4 மணிக்குள் சரி செய்து கொள்ளலாம் என தொழில்நுட்ப கல்வித்துறை அறிவித்துள்ளது. இதுகுறித்து, தொழில்நுட்பக் கல்வி ஆணையரும், தொழில்நுட்பத் தேர்வு வாரியத் தலைவருமான ஜெ.இன்னசென்ட் திவ்யா வெளியிட்டுள்ள அறிவிப்பில் கூறியிருப்பதாவது:-

தட்டச்சு, சுருக்கெழுத்து, கணக்குப் பதிவியல் உள்ளிட்ட வணிகவியல் தேர்வுகளுக்கு விண்ணப்பித்து, பிப்ரவரி 4-ம் தேதிக்குப் பிறகு அறிவிக்கப்பட்டுள்ள நேர்முகத் தேர்வு மற்றும் தேர்வுகளை எதிர்கொள்ளும் மாணவர்கள் உரிய ஆவணங்களை இன்று காலை 10 மணி முதல் மாலை 4 மணி வரை தேர்வு மையங்களில் சமர்ப்பித்து தேர்வு பேட்ஜை மாற்றிக் கொள்ளலாம். பிப்ரவரி 4-ம் தேதிக்கு முன் அறிவிக்கப்பட்டுள்ள நேர்காணல் மற்றும் தேர்வுகளில் கலந்து கொண்டவர்கள், தேர்வுக் குழுவை மாற்ற வேண்டும் என்றால், கூடுதல் தொழில்நுட்பக் கல்வி இயக்குனரின் பெயரில் டிமாண்ட் டிராப்ட் எடுத்து 5 மடங்கு அபராதம் செலுத்தி விண்ணப்பிக்க வேண்டும்.

தேர்வு மையங்களில் இன்று எந்தக் கட்டணமும் செலுத்தாமல் தட்டச்சுப்பொறி எண்ணை மாற்றிக் கொள்ளலாம். தேர்வின் போது தட்டச்சுப்பொறியில் கோளாறு ஏற்பட்டால், தேர்வு மைய முதன்மைக் கண்காணிப்பாளரிடம் கடிதம் கொடுத்து கட்டணம் செலுத்தாமல் தட்டச்சுப் பொறியை மாற்றிக் கொள்ளலாம். மேலும், வணிகவியல் தேர்வுகளுக்குச் சமர்ப்பிக்கப்பட்ட விண்ணப்பங்களில் உள்ள விண்ணப்பப் பிழைகளை முழுமையாகச் சரி செய்ய விரும்பினால், இன்று மாலை 4 மணிக்குள் தொழில்நுட்பக் கல்வி இயக்குனரகத்தில் 5 மடங்கு கட்டணத்தைச் செலுத்தி திருத்திக்கொள்ளலாம். அதன்பிறகு, தேர்வு மையங்களிலும், தொழில்நுட்பக் கல்வி இயக்குநரகத்திலும் எந்த மாற்றமும் செய்யப்படாது. இவ்வாறு அவர் கூறியுள்ளார்.