கடந்த இரண்டு நாட்களாக திருநெல்வேலி, தென்காசி, தூத்துக்குடி மாவட்டங்களில் இடைவிடாத மழை பெய்து வருகிறது. இதனால் அணைகளில் நீர்மட்டம் அதிகரித்துள்ளதோடு, அறுவடைக்கு தயாராக இருந்த நெற்பயிர்கள் பெரிதளவில் சேதமடைந்துள்ளன.
நேற்று காலை வரையிலான 24 மணி நேரத்தில், திருநெல்வேலி மாவட்டத்தில் அதிகபட்சமாக ஊத்து பகுதியில் 79 மி.மீ. மழை பதிவாகியது. நாலுமுக்கு பகுதியில் 74, காக்காச்சியில் 67, மாஞ்சோலையில் 60, சேர்வலாறில் 52, பாபநாசத்தில் 51, ராதாபுரத்தில் 48, களக்காட்டில் 43.60 மி.மீ. மழை பெய்தது.
பாபநாசம் அணைக்கு விநாடிக்கு 1,919 கனஅடி தண்ணீர் வரத்து இருந்தது. இதன் காரணமாக 1,100 கனஅடி நீர் வெளியேற்றப்பட்டது. சேர்வலாறு அணையின் நீர்மட்டம் 93.57 அடியாகவும், மணிமுத்தாறு அணையின் நீர்மட்டம் 88.03 அடியாகவும் உயர்ந்துள்ளது.
தென்காசியில், தொடர்ந்து பெய்த மழையால் கீழப்பாவூர், வடக்கு வீரவநல்லூர் உள்ளிட்ட பகுதிகளில் நெற்பயிர்கள் சாய்ந்து கிடக்கின்றன. அறுவடை வேலைகள் தடைபட்டுள்ளதால் விவசாயிகள் கவலையடைந்துள்ளனர்.
தூத்துக்குடி மாவட்டத்திலும் பல்வேறு பகுதிகளில் கனமழை பெய்ததால், விவசாய நிலங்களில் நீர் தேங்கி நின்று பயிர்கள் சேதமடைந்துள்ளன. தூத்துக்குடி, திருச்செந்தூர் உள்ளிட்ட நகரங்களில் மழைநீர் சாலைகளில் தேங்கி, போக்குவரத்து பாதிக்கப்பட்டது. நகராட்சி நிர்வாகம் சார்பில் மழைநீர் அகற்றும் பணிகள் மேற்கொள்ளப்பட்டன.
கடந்த சில நாட்களாக தொடர்ச்சியாக பெய்து வரும் மழை, பயிர்களுக்கு பெரும் சேதத்தை ஏற்படுத்தியுள்ளதாக விவசாயிகள் தெரிவித்துள்ளனர். மழை நீடித்தால் சேதம் மேலும் அதிகரிக்கக்கூடும் என்பதால், அரசு உரிய நிவாரண உதவிகளை வழங்க வேண்டும் என்ற கோரிக்கையும் எழுந்துள்ளது.
