மும்பை: வி.வி.ஐ.பி விருந்தினர்கள், ஆடம்பர கொண்டாட்டங்கள் மற்றும் ஆடம்பர செலவுகள் என்று பரவலாக பேசப்பட்ட இந்தியாவின் பணக்காரர் அம்பானி குடும்பத்தின் திருமண போஸ்டர், பிரதமர் மோடியின் படத்துடன் திடீரென அரசியல் சர்ச்சையை கிளப்பியுள்ளது.
ஆசியாவின் மிகப் பெரிய பணக்காரரான முகேஷ் அம்பானியின் இளைய மகன் ஆனந்த் அம்பானி (29) மற்றும் ராதிகா மெர்ச்சண்ட் ஆகியோரின் திருமணத்தையொட்டி, மும்பையில் கோலாகலமாக கொண்டாட்டங்கள் நடைபெற்று வருகின்றன. இந்நிலையில், அம்பானியின் ரிலையன்ஸ் இண்டஸ்ட்ரீஸ் நிறுவனத்துக்கு சொந்தமான ஜியோ வேர்ல்ட் கன்வென்ஷன் சென்டருக்குச் செல்லும் சாலையில், ஆளும் கட்சி (பாஜக) தொண்டர்கள் சிலர் ஒட்டிய பிரதமர் மோடியின் உருவம் கொண்ட சில போஸ்டர்கள் கவனத்தை ஈர்த்துள்ளன. அதில், “இந்தியாவின் அன்புக்குரிய மற்றும் பிரியமான பிரதமர் நரேந்திர மோடிக்கு மும்பையின் அன்பான வரவேற்பு” என்று எழுதப்பட்டிருந்தது.
நிகழ்ச்சி ஏற்பாட்டாளர்கள் வெளியிட்ட விருந்தினர் பட்டியலில் பிரதமர் மோடியின் பெயர் இடம்பெறவில்லை என்பது குறிப்பிடத்தக்கது. திருமணம் நடக்கும் பாந்த்ரா குர்லா காம்ப்ளக்ஸ் மாவட்டத்தைச் சேர்ந்த போக்குவரத்து அதிகாரி மனோஜ் ஷிண்டே கூறுகையில், “பிரதமர் மோடி ஒரு நிகழ்ச்சியை துவக்கி வைக்க மும்பை வருகிறார். பிறகு அம்பானி வீட்டில் நடக்கும் திருமணத்தில் சிறிது நேரம் கலந்து கொள்ளலாம்” என்றார்.
மாநில பாஜக செய்தித் தொடர்பாளர் கேசவ் உபாத்யாய் கூறுகையில், இந்த போஸ்டர்கள் பாஜகவால் ஒட்டப்படவில்லை என்றாலும் ஆர்வமுள்ள தொண்டர்களால் ஒட்டப்பட்டிருக்கலாம். அம்பானி போன்ற தொழிலதிபர்களுடன் பிரதமர் நரேந்திர மோடி மிக நெருங்கிய உறவைக் கொண்டுள்ளார் என்று இந்தியாவின் கூட்டணிக் கட்சிகள் குற்றம் சாட்டியும் கடுமையாக விமர்சித்தது குறிப்பிடத்தக்கது.
பொதுமக்கள் கோபம்: இதற்கிடையில், அம்பானி இல்லத்தில் நடைபெறும் திருமணத்தில் சர்வதேச மற்றும் தேசிய பிரபலங்கள், அரசியல்வாதிகள் மற்றும் தொழில் அதிபர்கள் பலர் கலந்துகொள்வார்கள் என எதிர்பார்க்கப்படுவதால், உள்ளூர் அதிகாரிகள் இந்த நிகழ்வை பொது நிகழ்வாக கருதுகின்றனர். இதனால், திருமண விழா நடைபெறும் நான்கு நாட்களுக்கு அப்பகுதி பொதுமக்கள் பயன்படுத்த தடை விதிக்கப்பட்டுள்ளது, மும்பை உள்ளூர் மக்களிடையே கோபத்தை தூண்டியுள்ளது.
இதற்கிடையில், பாப் நட்சத்திரங்களான ரிஹானா மற்றும் ஜஸ்டின் பீபர் கலந்து கொண்ட திருமணத்திற்கு முந்தைய ஒரு மாத விழாவிற்கு அம்பானி குடும்பத்தினர் மில்லியன் கணக்கில் செலவு செய்தனர். வருமான சமத்துவமின்மை அதிகமாக இருக்கும் இந்தியாவில் இது பல விவாதங்களைத் தூண்டியுள்ளது. இந்த நிகழ்வுகள் பொருளாதாரத்தை உயர்த்தும் என்றும் பலருக்கு வணிக வாய்ப்புகளை உருவாக்கும் என்றும் சிலர் தெரிவித்துள்ளனர். எனினும் பல்வேறு கட்சிகளை சேர்ந்தவர்களும் விமர்சனங்களை முன்வைத்துள்ளனர்.
