திருமண புகைப்படம் எடுக்கும் இளைஞர்களின் வாழ்க்கையில் நடக்கும் சம்பவங்களை மையமாக வைத்து உருவாகியுள்ள படம் ‘2கே லவ் ஸ்டோரி’. ஜெகவீர் ஹீரோவாக அறிமுகமாகிறார். மீனாட்சி கோவிந்தராஜன் கதாநாயகியாக நடிக்கிறார். பால சரவணன், ஆண்டனி பாக்யராஜ், ஜெயபிரகாஷ், வினோதினி மற்றும் பலர் நடித்துள்ளனர்.
டி.இமான் இசையமைத்துள்ளார். சிட்டி லைட் பிக்சர்ஸ் நிறுவனம் தயாரிக்கும் இந்தப் படம் பிப்ரவரி 14-ம் தேதி வெளியாகிறது. இதன் டிரைலர் வெளியீட்டு விழா சென்னையில் நடைபெற்றது. படத்தை இயக்கிய சுசீந்திரன், “2K லவ் ஸ்டோரி எனக்கு முக்கியமான படம். ஒரு படத்தை மக்களிடம் கொண்டு செல்வது முக்கியம். படத்தை எடுத்த தயாரிப்பாளர் தனஞ்செயன் சாருக்கு நன்றி.
‘பிரேமலு’ வெளியானபோது யாருக்கும் தெரியாது. ரிலீஸ் ஆன அடுத்த ஷோவில்தான் உலகம் இதைப் பற்றி அறிந்தது. அதேபோல் இந்தப் படமும் பெரிய வெற்றி பெறும். ‘பிரேமலு’ மாதிரி பெரிய வசூல் தரும் படமாக இது இருக்கும்” என்றார். இயக்குநர் எழில், நடிகர்கள் அருள்தாஸ், பாலசரவணன், திவ்யா துரைசாமி, மீனாட்சி கோவிந்தராஜன் உள்ளிட்ட பலர் கலந்து கொண்டனர்.
