சென்னை: சிவகார்த்திகேயனின் கேரியரில் இது ஒரு குறிப்பிடத்தக்க சாதனையாக பார்க்கப்படுகிறது. ராஜ்குமார் பெரியசாமி இயக்கத்தில் சிவகார்த்திகேயன் நடிப்பில் உருவாகியுள்ள ‘அமரன்’ திரைப்படம் தீபாவளியை முன்னிட்டு அக்டோபர் 31-ம் தேதி திரையரங்குகளில் வெளியாகியுள்ளது.
இந்தப் படத்தில் சாய் பல்லவி நாயகியாக நடித்துள்ளார். ஜிவி பிரகாஷ் குமார் இசையமைத்துள்ளார். இப்படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரித்துள்ளது. மேஜர் முகுந்த் வரதராஜனின் வாழ்க்கை வரலாற்று படமாக இப்படம் உருவாகியுள்ளது.
படம் வெளியான முதல் நாளிலேயே ரசிகர்களிடம் நல்ல வரவேற்பை பெற்றது. முதல் நாள் ரூ.45 கோடிக்கு மேல் வசூலித்ததாக படக்குழு அறிவித்துள்ளது. சமீபத்தில் படக்குழுவினர் வெற்றி விழா நிகழ்ச்சியும் நடத்தினர். இந்நிலையில் படம் வெளியாகி 10 நாட்கள் கடந்துள்ள நிலையில், இப்படம் உலகம் முழுவதும் ரூ. 200 கோடி வசூலை தாண்டியுள்ளது.
இந்தியாவில் மட்டும் ரூ.122 கோடி வசூலித்துள்ளதாக கூறப்படுகிறது. இந்தப் படத்தின் பட்ஜெட் 100 கோடி. கடந்த வெள்ளிக்கிழமை கோலிவுட்டில் இருந்து எந்தப் படமும் வெளியாகாதது இந்தப் படத்துக்கு ப்ளஸ். அடுத்ததாக சூர்யாவின் ‘கங்குவா’ படம் நவம்பர் 14-ம் தேதி வெளியாகவிருப்பதால், அதுவரை ‘அமரன்’ வசூல் செய்யும் என்று பட வியாபாரிகள் கணித்துள்ளனர்.
