அறிமுக இயக்குனர் தினகரன் சிவலிங்கம் இயக்கத்தில் உருவாகியுள்ள படம் ‘பாட்டல் ராதா’. குரு சோமசுந்தரம், சஞ்சனா, ஜான்விஜய், மாறன் மற்றும் பலர் நடித்துள்ள இப்படத்தை நீலம் புரொடக்ஷன்ஸ் மற்றும் பலூன் பிக்சர்ஸ் தயாரிக்கிறது. ஷான் ரோல்டன் இசையமைத்துள்ள இப்படத்தின் டிரைலர் வெளியீட்டு விழா சென்னையில் நடைபெற்றது.
சிறப்பு விருந்தினர்களாக வெற்றிமாறன், லிங்குசாமி, அமீர், மிஷ்கின், பா.ரஞ்சித் ஆகியோர் கலந்து கொண்டனர். வெற்றிமாறன் பேசுகையில், ”இன்றைய சூழலில் ஒவ்வொருவரும் ஏதாவது ஒரு விஷயத்திற்கு அடிமையாகி விடுகின்றனர். இந்த ‘அடிக்ஷன்’ எல்லாக் காலங்களிலும் இருந்திருக்கிறது. இன்று அது இன்னும் அதிகமாக உள்ளது. இப்போது நாம் டிஜிட்டல் அடிமைகள்.
முன்பு ஒரு தெருவில் 5 பேர் மது அருந்தினால் அவர்களில் ஒருவர் மது அருந்துபவர். இன்றைக்கு வீட்டில் இருப்பவர் குடிக்காமல் இருந்தால் பெரிய விஷயம். ஒரு தெருவில் பத்து குடிகாரர்கள் இருக்கிறார்கள். இந்தக் காலக்கட்டத்தில் ‘பாட்டல் ராதா’ போன்ற படங்களைச் சமூகம் உருவாக்குவது அவசியம் என்று நினைக்கிறேன். “இந்தப் படம் பேசும் அரசியல் முக்கியமானது. இது ஒரு பாசிட்டிவ் படம்,” என்றார்.
