சென்னை: சூப்பர் ஸ்டார் ரஜினிகாந்தின் 50வது ஆண்டு திரை வாழ்க்கையை முன்னிட்டு வெளியாகிய கூலி படம் ரசிகர்களிடையே பெரும் வரவேற்பைப் பெற்றுள்ளது. லோகேஷ் கனகராஜ் இயக்கிய இப்படத்தில் நாகார்ஜுனா, உபேந்திரா, சௌபின் சாஹிர், ஸ்ருதி ஹாசன், சத்யராஜ் உள்ளிட்ட பலர் இணைந்து நடித்துள்ளனர். அனிருத் இசையமைத்த இப்படம், முதல் நாளிலேயே ரூ.151 கோடி வசூலை பெற்று சாதனை படைத்தது.
முதல் வார இறுதிக்குள் படத்தின் வசூல் ரூ.404 கோடி என அறிவிக்கப்பட்டது. இதனால், ரஜினியின் ரசிகர்கள் சமூக வலைதளங்களில் கொண்டாட்டத்தில் மிதந்தனர். ஆனால், 15 நாட்கள் கடந்த நிலையில் வசூல் விவரங்களைப் பற்றிய முரண்பாடுகள் எழுந்துள்ளன. குறிப்பாக, தயாரிப்பாளர் ஜி.தனஞ்ஜெயன் கூறிய கருத்துகள், ரஜினி PR ரியாஸ் அகமது மற்றும் ரசிகர்களை அதிருப்தியடையச் செய்துள்ளன.
ரியாஸ் அகமது, வீடியோவொன்றை வெளியிட்டு தனஞ்ஜெயனிடம் பல கேள்விகளை எழுப்பினார். அவர், “கூலி படத்தின் தயாரிப்பாளர் நீயா இல்லையா? யாரிடமிருந்து பணம் வாங்கி இப்படத்தை பற்றி பேசுற? தயாரிப்பாளர் சங்கத்தில் இருந்து ராஜினாமா செய்து பேசு” என்று கடுமையாக விமர்சித்தார். மேலும், “நான் பாஷாவா மாறுவேன், இன்னும் பேச வேண்டாம்” என எச்சரித்தார்.
இதனால், ரஜினி ரசிகர்கள் சமூக வலைதளங்களில் பெரும் விவாதத்தில் ஈடுபட்டனர். வீடியோ வேகமாக வைரலாகியது. இந்த சூழலில் தனஞ்ஜெயன் தனது ட்விட்டர் பக்கத்தில் விளக்கம் அளித்தார். அவர், “பெரிய படங்களைப் பற்றி எந்தவிதமான நெகட்டிவிட்டியையும் பரப்ப விரும்பவில்லை. நான் சொன்னது தவறாக எடுத்துக்கொள்ளப்பட்டது. இனி பெரிய படங்களின் வசூல் குறித்த கருத்துக்களைச் சொல்ல மாட்டேன்” என்று பதிவிட்டார்.
தற்போது, ரஜினியின் கூலி படம் வசூல் மட்டுமல்லாமல், அதனைச் சுற்றியுள்ள வார்த்தைப் போரும் ரசிகர்கள் மற்றும் திரையுலகினரிடையே பெரும் சலசலப்பை ஏற்படுத்தியுள்ளது. ரஜினியின் அடுத்தடுத்த படங்களை முன்னிட்டு இந்த சர்ச்சை நீண்டுகொள்ளுமா என்பது ரசிகர்கள் மத்தியில் கேள்வியாக உள்ளது.
