லோகேஷ் கனகராஜ் இயக்கத்தில் ரஜினி நடித்துள்ள படம் ‘கூலி’. மேலும் இதில் சத்யராஜ், அமீர்கான், உபேந்திரா, நாகார்ஜுனா, ஸ்ருதி ஹாசன் மற்றும் பலர் நடித்துள்ளனர். இதன் படப்பிடிப்பு சமீபத்தில் ஜெய்ப்பூரில் நடைபெற்றது. அங்கு அமீர்கான் நடிக்கும் காட்சிகள் படமாக்கப்பட்டன.
அடுத்ததாக தாய்லாந்தில் படப்பிடிப்பு நடைபெறவுள்ளது. இந்நிலையில், சென்னை விமான நிலையம் வந்தடைந்த நடிகர் ரஜினிகாந்த் செய்தியாளர்களிடம் கூறுகையில், “கூலி படத்தின் படப்பிடிப்பு 70% நிறைவடைந்துள்ளது. அடுத்த கட்ட படப்பிடிப்பு தாய்லாந்தில் வரும் 13-ம் தேதி முதல் 28-ம் தேதி வரை நடைபெறவுள்ளது” என்றார். அவரிடம் ஒருவர் அரசியல் குறித்து கேள்வி கேட்க முயன்றார். அப்போது, “அரசியல் பற்றி கேள்வி கேட்க வேண்டாம் என்று ஏற்கனவே சொல்லிவிட்டேன்” என்று கூறிவிட்டு சென்றுவிட்டார்.
