சென்னை: ‘டியூட்’ திரைப்படம் மூலம் இயக்குநராக அறிமுகமாகும் கீர்த்திஸ்வரன், பிரதீப் ரங்கநாதன் மற்றும் மமிதா பைஜூவை இணைத்து ஒரு புதுமையான கதையுடன் வந்துள்ளார். மைத்ரி மூவி மேக்கர்ஸ் தயாரித்த இந்த படம் தீபாவளி பண்டிகையை முன்னிட்டு அக்டோபர் 17ஆம் தேதி வெளியாகவுள்ளது. ரங்கஸ்தலம், உப்பேனா, புஷ்பா போன்ற பல ஹிட் படங்களை வழங்கிய நிறுவனம், இப்போது கோலிவுட்டில் தனது பங்களிப்பை வலுப்படுத்தி வருகிறது. சரத்குமார் முக்கிய கதாபாத்திரத்தில் நடித்திருக்கும் இந்த படம் ரசிகர்களிடையே பெரிய எதிர்பார்ப்பை ஏற்படுத்தியுள்ளது.
ஹைதராபாத்தில் நடைபெற்ற டிரைலர் வெளியீட்டு விழாவில் நடந்த ஒரு சம்பவம் தற்போது சமூக வலைதளங்களில் பரபரப்பை ஏற்படுத்தியுள்ளது. அந்த விழாவில் பங்கேற்றிருந்த பிரதீப் ரங்கநாதனிடம் ஒரு செய்தியாளர், “நீங்கள் ஹீரோ மெட்டீரியல் இல்லாதவராக இருந்தும் இப்போது ஹீரோவாகி இருக்கிறீர்கள். இதற்குக் காரணம் அதிர்ஷ்டமா அல்லது விடாமுயற்சியா?” என கேள்வி எழுப்பினார். அந்த கேள்விக்கு பிரதீப் சிந்தித்தபடி பதிலளிக்க முயன்றபோது அருகில் இருந்த சரத்குமார் உடனே மைக் பிடித்து, சிறந்த பதிலை வழங்கினார்.
“நான் 170க்கும் மேற்பட்ட படங்களில் நடித்துள்ளேன். யார் ஹீரோ மெட்டீரியல் என்று நீங்கள் தீர்மானிக்க முடியாது. அனைவருக்கும் அவரவர் தனித்தன்மை உண்டு. சமூகத்திற்காக நல்லது செய்பவர்கள் எல்லாரும் ஹீரோவாகத்தான் கருதப்பட வேண்டும்,” என சரத்குமார் பதிலளித்தார். அவரது இந்த பதில் அங்கிருந்த அனைவரையும் கவர்ந்தது. பிரதீப் மற்றும் குழுவினர் சிரித்துக்கொண்டே அவரை பாராட்டினர்.
‘டியூட்’ திரைப்படத்தின் டிரைலர் வெளியீட்டுக்கு பிறகு, படம் தீபாவளி போட்டியில் வெற்றி பெறும் படங்களின் பட்டியலில் இடம்பெற்றுள்ளது. சாய் அபயங்கர் இசையமைப்பில், மமிதா பைஜூ பிரதீப்புடன் இணைந்து நடித்துள்ள இந்த படம் ரசிகர்களிடையே எதிர்பார்ப்பை கூட்டியுள்ளது. சரத்குமார் கூறிய பதில், இளம் நடிகர்களுக்கு ஒரு ஊக்கமாக மாறி, சமூக வலைதளங்களில் வைரலாகி வருகிறது.
