வேர்க்கடலை சட்னி செய்ய தேவையான பொருட்கள்: 2 டீஸ்பூன் எண்ணெய், 6 வரமிளகாய், 20 சின்ன வெங்காயம், 10 பல் பூண்டு, சிறிய துண்டு புளி, 1/4 கப் வேர்க்கடலை, 1/4 கப் துருவிய தேங்காய், 1 கொத்து கொத்தமல்லி, உப்பு சுவைக்கேற்ப, தேவையான அளவு தண்ணீர், 1 டேபிள் ஸ்பூன் எண்ணெய், 1/2 டீஸ்பூன் கடுகு, 1/2 டீஸ்பூன் உளுத்தம் பருப்பு, 1 கொத்து கறிவேப்பிலை.
செய்முறை: முதலில் ஒரு கடாயை அடுப்பில் வைத்து, அதில் 2 டீஸ்பூன் எண்ணெய் ஊற்றி, அது சூடானதும் வரமிளகாயை சேர்த்து 1 நிமிடம் வறுத்து ஒரு தட்டில் எடுத்துக் கொள்ள வேண்டும். பின்னர் அதே எண்ணெயில் சின்ன வெங்காயம் மற்றும் பூண்டு சேர்த்து, கண்ணாடி பதத்திற்கு வதக்க வேண்டும். அதன் பின் புளியை சேர்த்து வதக்க வேண்டும்.
அடுத்ததாக, வேர்க்கடலையை சேர்த்து நன்கு வறுக்க வேண்டும். பிறகு அதில் துருவிய தேங்காய் மற்றும் கொத்தமல்லியை சேர்த்து 1 நிமிடம் வதக்கி இறக்கி குளிர வைக்க வேண்டும். பிறகு, இந்த பொருட்களை மிக்சர் ஜாரில் சேர்த்து, சுவைக்கேற்ப உப்பையும் சேர்த்து, சிறிது நீர் ஊற்றி கொரகொரமாக அரைத்துக் கொள்ள வேண்டும்.
இப்போது அரைத்த சட்னியை ஒரு கிண்ணத்தில் எடுத்துக் கொண்டு, தேவையான அளவு நீரை ஊற்றி கலந்து கொள்ள வேண்டும். இறுதியில், ஒரு காடாயை அடுப்பில் வைத்து, அதில் தாளிப்பதற்கு எண்ணெய் ஊற்றி, அது சூடானதும் கடுகு, உளுத்தம் பருப்பு மற்றும் கறிவேப்பிலை சேர்த்து தாளித்து, அந்த தாளிப்பையும் சட்னியுடன் சேர்த்து கிளறினால், சுவையான வேர்க்கடலை சட்னி தயார்.
