புதுடெல்லி: கிளாசிக்கல் செஸ் போட்டிகளுக்கான தரவரிசைப் பட்டியலை பிடே வெளியிட்டுள்ளது. இதில், உலக சாம்பியனான இந்தியாவின் டி.குகேஷ் 2,787 புள்ளிகளுடன் 3-வது இடத்துக்கு முன்னேறியுள்ளார். கிளாசிக்கல் தரவரிசையில் குகேஷ் 3-வது இடத்துக்கு முன்னேறுவது இதுவே முதல்முறை. நார்வேயின் மேக்னஸ் கார்ல்சன் 2,833 புள்ளிகளுடன் தொடர்ந்து முதலிடத்தில் உள்ளார்.
அமெரிக்காவின் ஹிகாரு நகமுரா 2,802 புள்ளிகளுடன் 2-வது இடத்தில் உள்ளார். நீண்ட காலமாக 3-வது இடத்தில் இருந்த இந்தியாவின் அர்ஜுன் எரிகைசி 2 இடங்கள் இழந்து 2,777 புள்ளிகளுடன் 5-வது இடத்துக்கு தள்ளப்பட்டுள்ளார். மற்றொரு இந்திய கிராண்ட்மாஸ்டர் ஆர். பிரக்ஞானந்தா, டாடா ஸ்டீல் மாஸ்டர்ஸ் தொடரை வென்று 17 புள்ளிகள் அதிகரித்து 2,758 புள்ளிகளுடன் 8-வது இடத்தைப் பிடித்துள்ளார். பெண்கள் பிரிவில் இந்தியாவின் கொனேரு ஹம்பி 2,528 புள்ளிகளுடன் 6-வது இடத்தில் உள்ளார். ஆர்.வைஷாலி 2,484 புள்ளிகளுடன் 14-வது இடத்திலும், ஹரிகா துரோணவல்லி 2,483 புள்ளிகளுடன் 16வது இடத்திலும் உள்ளனர்.
