பார்படாஸ்: இதுதான் எங்களின் வியூகம்… டி20 உலக கோப்பை தொடரில் வெற்றி பெற்று சாம்பியன் பட்டம் பெற்ற பின் ரோகித் சர்மா கூறும்போது, நாங்கள் இன்று படைத்த சாதனைக்காக மிக அதிக பெருமை கொள்கிறோம் என கூறியுள்ளார்.
9-வது டி20 உலகக்கோப்பை தொடரின் இறுதிப்போட்டியில் தென்ஆப்பிரிக்க அணிக்கு 177 ரன்கள் என்ற சவாலான இலக்கை இந்திய அணி நிர்ணயித்தது.. எனினும், 20 ஓவர்களில் 8 விக்கெட்டுகள் இழப்புக்கு அந்த அணி 169 ரன்களே எடுத்தது. இதனால், இந்திய அணி 7 ரன்கள் வித்தியாசத்தில் வெற்றி பெற்று கோப்பையை தட்டி சென்றது.
ஜெய்ஷாவிடம் இருந்து இந்திய அணியின் கேப்டன் ரோகித், சாம்பியன் கோப்பையை பெற்று கொண்டார். அவர் பேசும்போது, இந்த போட்டியில் பெற்ற வெற்றி இன்று ஒரு நாளில் கிடைத்தது அல்ல. இதற்காக கடந்த 3 முதல் 4 ஆண்டுகளாக நாங்கள் கடுமையாக உழைத்தோம். போட்டியில் நாங்கள் வெற்றி பெற்று இருப்பதற்கு பின்னணியில் நிறைய நடந்திருக்கின்றன.
அதனாலேயே, இன்று எங்களுக்கு இந்த முடிவு கிடைத்திருக்கிறது. கடந்த காலங்களில் அதிக நெருக்கடியான போட்டிகளை நாங்கள் நிறைய விளையாடினோம். ஆனால், தவறான பகுதியிலேயே இருந்தோம். ஆனால், எது தேவையாக உள்ளது என வீரர்கள் புரிந்து கொண்டு செயல்பட்டனர்.
எது தேவையோ, அதனை செய்ததில் இன்றைய தினம் சிறந்த எடுத்துக்காட்டாக உள்ளது. ஓரணியாக நாங்கள் அனைவரும் ஒன்றிணைந்து செயல்பட்டோம். விராட் கோலி சிறப்பாக விளையாடுவார் என்பதில் எனக்கோ மற்றும் வேறு எவருக்கோ சந்தேகமே இருந்தது இல்லை. அவருடைய தரம் பற்றி நாங்கள் அறிந்திருக்கிறோம். 15 ஆண்டுகளில் அவருடைய போட்டியில் உச்சம் தொட்டிருக்கிறார்.
இந்த ரன்கள் எங்களுக்கு கிடைக்க, குழு முயற்சியே காரணம். போட்டியில் எவரேனும் ஒரு வீரர் நிலைத்து ஆட வேண்டும் என நாங்கள் விரும்பினோம். விராட் கோலி தன்னுடைய அனுபவங்களை கொண்டு அதனை சிறப்பாக செய்து முடித்திருக்கிறார். அவரை சுற்றி விளையாடிய வீரர்களும் உண்மையில் சிறப்பாக ஆடினர். என்றார். (போட்டியில் கோலி அடித்த 76 ரன்கள், இந்திய அணி 176 என்ற சவாலான இலக்கை நிர்ணயிக்க உதவியது.)
பும்ரா திறமையாக விளையாடினார். அவரிடம் இருந்து சிறந்த ஆட்டம் வெளிப்பட்டது. கடைசி ஓவரை ஹர்திக் திறமையாக கையாண்டார். அணி வீரர்கள் அனைவரின் விளையாட்டும் அற்புதம். நியூயார்க்கில் இருந்து பார்படாஸ் வரை அவர்களால் நான் முழுவதும் பெருமை அடைகிறேன். இந்தியாவில் இது இரவு நேரம். கோடிக்கணக்கானோர் அமர்ந்து, போட்டியை காண்பார்கள்.
எங்களை போன்று அவர்களும் நீண்டகாலம் காத்திருந்து வருகின்றனர். இது அவர்களுக்கானது. நாங்கள் இன்று படைத்த சாதனைக்காக மிக அதிக பெருமை கொள்கிறோம் என கூறியுள்ளார். இதன்பின்பு வீரர்கள் ஒவ்வொருவருக்கும் பதக்கங்கள் வழங்கப்பட்டன.
