ராஞ்சி: ஜார்க்கண்ட் முதல்வரும், ஜார்க்கண்ட் முக்தி மோர்ச்சா (ஜேஎம்எம்) தலைவருமான ஹேமந்த் சோரன், “சட்டசபை தேர்தலுக்கு அனைத்து அரசியல் கட்சிகளும் தயாராகி வருகின்றன.
எந்த கட்சி எத்தனை தொகுதிகளில் போட்டியிடும் என்பதை அறிய மக்கள் ஆர்வமாக உள்ளனர். இந்த தேர்தலை இந்திய கூட்டணி தீவிரமாக எடுத்துக்கொண்டது. ஒவ்வொரு அம்சமும் ஆய்வு செய்யப்படுகிறது.
இந்த தேர்தலில் இடதுசாரி கட்சிகளும் எங்கள் கூட்டணியில் அங்கம் வகிக்கின்றன. ஜார்க்கண்டில் மொத்தமுள்ள 81 தொகுதிகளில் 70 தொகுதிகளில் ஜேஎம்எம் மற்றும் காங்கிரஸ் கட்சிகள் போட்டியிடுகின்றன.
மீதமுள்ள 11 இடங்களில் ஆர்ஜேடி மற்றும் இடதுசாரி கட்சிகள் போட்டியிடும்” என்றார். ஒவ்வொரு கட்சியும் போட்டியிடும் எண்ணிக்கை குறித்த செய்தியாளர்களின் கேள்விக்கு பதிலளித்த ஹேமந்த் சோரன், “இப்போதைக்கு இதை மட்டுமே நாங்கள் முடிவு செய்துள்ளோம்.
தொகுதிகளின் சரியான எண்ணிக்கை தொடர்பான பிற தகவல்கள் விரைவில் பகிரப்படும். எங்கள் கூட்டாளிகள் சிலர் தற்போது இல்லாததால், என்னால் அதிக தகவல்களைப் பகிர்ந்து கொள்ள முடியவில்லை.
அவர்கள் இங்கு வந்தவுடன், தொகுதிகள், வேட்பாளர்கள், சட்டசபை தொகுதிகள் பற்றிய அனைத்து தகவல்களையும் பகிர்ந்து கொள்வோம்,” என்றார். கடந்த 2019 சட்டமன்றத் தேர்தலில் ஜேஎம்எம் 43 இடங்களில் போட்டியிட்டு 30 இடங்களில் வெற்றி பெற்றது.
31 இடங்களில் காங்கிரஸ் 16 இடங்களிலும், ஆர்ஜேடி 7 இடங்களிலும் போட்டியிட்டு ஒன்றில் வெற்றி பெற்றது. மக்களவை எதிர்க்கட்சித் தலைவரும், காங்கிரஸ் எம்பியுமான ராகுல் காந்தி, பீகார் சட்டப்பேரவை எதிர்க்கட்சித் தலைவர், ஆர்ஜேடி தலைவர் தேஜஸ்வி யாதவ் ஆகியோர் ராஞ்சியில் இன்று ஹேமந்த் சோரனை சந்தித்து பேச்சுவார்த்தை நடத்தினர்.
பாஜக தலைமையிலான தேசிய ஜனநாயகக் கூட்டணியின் தொகுதிப் பங்கீடு விவரம் நேற்று வெளியிடப்பட்டது. அதன்படி, பாஜக 68 இடங்களிலும், ஏஜேஎஸ்யு 10 இடங்களிலும், ஐக்கிய ஜனதா தளம் 2 இடங்களிலும், சிராக் பாஸ்வான் தலைமையிலான லோக் ஜனசக்தி கட்சி (ராம் விலாஸ்) 1 இடத்திலும் போட்டியிடுகின்றன.
