இந்தியாவின் வெளிநாட்டு உளவுத்துறை அமைப்பான ராவின் புதிய இயக்குநராக 1989 பேட்ச் ஐபிஎஸ் அதிகாரி பாரக் ஜெயின் நியமிக்கப்பட்டுள்ளார். மத்திய பிரதேச கேடரை சேர்ந்த இவர், மத்திய உளவுத்துறையில் நீண்ட அனுபவமுடையவர். ரா அமைப்பில் அவர் கடந்த சில ஆண்டுகளாக இரண்டாம் நிலை பதவியான ஸ்பெஷல் செயலாளராக பணியாற்றி வந்துள்ளார். புலனாய்வு நுட்பங்கள், வெளிநாட்டு நடவடிக்கைகள் மற்றும் உள்நாட்டு பாதுகாப்பு தொடர்பான திட்டங்களில் பாரக் ஜெயினுக்கு ஆழ்ந்த அறிவும் அனுபவமும் இருப்பதாலே அவர் தேர்வு செய்யப்பட்டுள்ளார்.
தற்போதைய ரா தலைவர் சாமந்த்கோயல், 2019ல் பதவி ஏற்று இரண்டு முறை கால நீட்டிப்பைப் பெற்றவர். அவரது பதவிக்காலம் ஜூன் 30, 2025 அன்று முடிவடைவதால், அவரது பின் வாரியாக ஜூலை 1 முதல் பாரக் ஜெயின் பொறுப்பேற்க உள்ளார். இந்த முக்கிய நியமனத்துக்கான பரிந்துரை, தேசிய பாதுகாப்பு ஆலோசகர் அஜித் டோவல் தலைமையிலான குழுவால் வழங்கப்பட்டதாகவும், இதனை மத்திய அரசு ஆணை மூலம் அறிவித்துள்ளது. அவரது புதிய பதவிக்காலம் இரண்டு ஆண்டுகளாக இருக்கும்.
பாரக் ஜெயின், பாகிஸ்தான் மற்றும் தெற்கு ஆசியா தொடர்பான உளவுத்துறை பணிகளில் நிபுணத்துவம் பெற்றவர். முன்னதாக விமான ஆய்வு மைய இயக்குநராக பணியாற்றியபோது ட்ரோன் மற்றும் வான்வழி கண்காணிப்பு திட்டங்களில் முக்கிய பங்காற்றினார். ‘ஆபரேஷன் சிந்தூர்’ திட்டத்தில் அவர் செய்த புலனாய்வுப் பணி, ராவின் செயல்திறனுக்கு உறுதுணையாக அமைந்தது. அதனையே அடிப்படையாகக் கொண்டு அவருக்கு ராவின் தலைமை பொறுப்பு வழங்கப்பட்டதாக கூறப்படுகிறது.
இந்த நியமனம், இந்தியா எதிர்நோக்கும் வெளிநாட்டு உளவு சவால்களை கருத்தில் கொண்டு செய்யப்பட்ட முக்கியமான மாற்றமாக கருதப்படுகிறது. குறிப்பாக சீனா மற்றும் பாகிஸ்தான் உள்ளிட்ட எதிர்மறை உறவுகளுக்கு மத்தியிலும், ரா அமைப்பை வலுப்படுத்தும் பணி பாரக் ஜெயின் மீது உள்ளது. தேசிய பாதுகாப்பு தேவைகளுக்கான விஞ்ஞான தொழில்நுட்பங்களில் அவர் கொண்டுள்ள அனுபவம், இந்திய உளவுத்துறை செயல்பாடுகளை புதிய உயரத்திற்கு கொண்டு செல்லும் என எதிர்பார்க்கப்படுகிறது.
