ஹைதராபாத் நகரத்தில் பாரத் பயோடெக் நிறுவனம் உருவாக்கிய ஹில்கால் என்ற வாய்வழி காலரா தடுப்பு மருந்தின் மூன்றாம் கட்ட சோதனை வெற்றிகரமாக முடிந்ததாக அறிவிக்கப்பட்டுள்ளது. இந்த மருந்து, மனிதர்களுக்கு கடுமையான வயிற்றுப்போக்கு ஏற்படுத்தும் விப்ரியோ காலரே என்ற பாக்டீரியாவை எதிர்த்து செயல்படுகிறது. இந்தியாவில் ஆண்டுதோறும் 20,000 பேர் காலரா தொற்றால் உயிரிழக்கிறார்கள்.
இந்த நோய்க்கான தடுப்புக்கு பாரத் பயோடெக் நிறுவனம் பல ஆண்டுகளாக ஆய்வு செய்து வருகிறது. தடுப்பு மருந்து உருவாக்க நான்கு கட்டங்களில் சோதனை செய்யப்படுகிறது. இரண்டாம் கட்ட சோதனை ஏற்கனவே முடிந்த நிலையில், மூன்றாம் கட்ட சோதனையும் வெற்றிகரமாக நிறைவு பெற்றதாக அந்த நிறுவனம் தெரிவித்துள்ளது.மூன்றாம் கட்ட சோதனைக்காக இந்தியாவிலுள்ள 10 மருத்துவ மையங்களில், 1,800 பேர் மீது மருந்து பரிசோதிக்கப்பட்டது.
இதில் குழந்தைகள் முதல் பெரியவர்கள் வரை பலரும் கலந்து கொண்டனர். ஹில்கால் மருந்து, காலரா பாக்டீரியாக்களில் இருவகையான ஓகாவா மற்றும் இனாபா வகைகளுக்கும் எதிராக சிறப்பாக செயல்பட்டது.இந்த சோதனையின் வெற்றி, இந்திய மருத்துவ ஆராய்ச்சி முன்னேற்றத்தில் முக்கிய கட்டமாக பார்க்கப்படுகிறது. தற்போது, ஹில்கால் மருந்து சந்தைக்குத் தயாராகி வருகின்றது.
இது விரைவில் விற்பனைக்கு வரும் என எதிர்பார்க்கப்படுகிறது.மருந்தின் வாய்வழி வடிவம் மக்கள் பயன்பாட்டுக்கு வசதியானதாகும். இதனால் தொற்றைக் கட்டுப்படுத்தும் முயற்சியில் இது பரந்த அளவில் பயன்படும். மருத்துவர்களும் ஆராய்ச்சியாளர்களும் இந்த வெற்றியை வரவேற்றுள்ளனர்.இந்த புதிய வளர்ச்சி, இந்தியாவில் தோன்றும் தொற்றுநோய்கள் எதிர்கொள்ளும் திறனை மேம்படுத்தும். பரவலாக இதனை பயன்படுத்துவதால் மக்கள் நலத்திலும் பெரிய மாற்றம் ஏற்படும். அதேசமயம், இது உலகளவில் காலரா தடுப்புக்கு இந்தியாவின் பங்களிப்பை மேலும் உயர்த்தும்.
