கேரள மாநிலம் கோட்டயத்தில் உள்ள ஒரு இளம் ஸ்டார்ட் அப் நிறுவனம், வீட்டில் வளர்க்கப்படும் செல்ல நாய்களின் நலனைக் கருத்தில் கொண்டு, அவர்களுக்கேற்ப தனிப்பட்ட உணவுகளை வீட்டிலேயே தயாரித்து நேரடியாக டோர் டெலிவரி செய்யும் சேவையை அறிமுகப்படுத்தியுள்ளது. இந்த புதிய முயற்சி கோட்டயத்தின் உள்ளூர் மக்களிடையே மட்டுமல்லாமல், பிற நகரங்களிலும் ஆர்வத்தை தூண்டி வருகிறது. சமூக ஊடகங்களில் இதுபற்றி பரவும் புகழும் அதிகரித்து வருகிறது.
“கேஸ் டாக் புட்” என அழைக்கப்படும் இந்த ஸ்டார்ட் அப், நண்பர்களான சாரங் ஸ்ரீதர் மற்றும் கோவிந்த் ஆகியோரால் தொடங்கப்பட்டது. இருவரும் தங்கள் சொந்த செல்ல நாய்கள் அடிக்கடி நோய்வாய்ப்படுவதை கவனித்த பிறகு, சத்து மிக்க, இயற்கையான உணவுகளால் அவர்களின் நலத்தை மேம்படுத்தலாம் என்ற எண்ணத்தில் இந்த முயற்சியை ஆரம்பித்தனர். கால்நடை மருத்துவ நிபுணர்கள், இயற்கை மருத்துவர் அபிஜித் கர்மா ஆகியோரின் ஆலோசனையுடன் இந்த உணவுகள் தயாரிக்கப்படுகின்றன.
இவர்கள் வழங்கும் உணவுகள் 100 சதவீதம் இயற்கையாகவும், பசுமை சார்ந்த முறையில் தயாரிக்கப்பட்டவையாகவும் உள்ளன. நாய்களின் அளவுக்கு ஏற்ப சிறியது, நடுத்தரம் மற்றும் பெரியது என மூன்று வகைகளில் உணவுகள் வகைப்படுத்தப்படுகின்றன. வாடிக்கையாளர்கள் உணவை வாட்ஸ்அப்பில் ஆர்டர் செய்யலாம், மேலும் நகரத்தின் 15 கிலோமீட்டர் சுற்றளவில், தினமும் காலை சமையல் முடிந்த பிறகு பிற்பகல் 3 மணிக்குள் டெலிவரி செய்யப்படுகிறது.
இப்போது நாள் ஒன்றுக்கு சுமார் 25-30 வாடிக்கையாளர்களுக்கு சேவை வழங்கும் இந்நிறுவனம், விரைவில் சொந்த செயலியை அறிமுகப்படுத்தி, சேவையை கொச்சி மற்றும் பெங்களூரு வரை விரிவுபடுத்த திட்டமிட்டு உள்ளது. கோட்டயம் போன்ற ஒரு சிறிய நகரத்தில் இருந்து இதுபோன்ற ஆக்கப்பூர்வமான முயற்சி வெளிவருவதே சிறப்பு. இந்த முயற்சி செல்லப்பிராணி உணவுப் பிழைப்பில் புதிய பாதையைத் திறந்துவைத்திருக்கிறது.
