பெங்களூரு நகரில் வணிகர்கள் மத்தியில் தற்போது பரபரப்பை ஏற்படுத்திய விவகாரம், வணிக வரித்துறை அனுப்பிய ஜி.எஸ்.டி. நோட்டீஸாகும். ஆன்லைன் பரிவர்த்தனைகளை கணக்கிட்டு, ஆண்டுக்கு ரூ.40 லட்சத்திற்கும் மேல் வருமானம் ஈட்டும் வியாபாரிகள் கட்டாயமாக ஜி.எஸ்.டி. செலுத்த வேண்டும் என தெரிவிக்கப்பட்டுள்ளது. இதன் விளைவாக, பேக்கரி, பால், காய்கறி, சிகரெட், மளிகை, அழகு நிலையம் போன்ற கடை நடத்தும் 14,000 வியாபாரிகள் நோட்டீஸ் பெற்றுள்ளனர். பெரும்பாலானோர் ரூ.10 லட்சம் வரை வரி விதிக்கப்பட்டதில் அதிர்ச்சி அடைந்துள்ளனர்.
நோட்டீஸ் காரணமாக, கூகுள் பே, போன் பே போன்ற யு.பி.ஐ. சேவைகள் மூலமாக பணம் பெறுவதை நிறுத்தி, பல கடைகள் தங்கள் கியூ.ஆர். ஸ்கேனர்களை அகற்றி விட்டனர். சிலர் ‘பணம் மட்டுமே’ என அறிவிப்பு பலகைகளை வைக்க, இது விற்பனை குறைந்தாலும் அதிக வரிக்கு சிக்காமல் தப்பிக்க முடியும் என்ற நம்பிக்கையில் நடந்து வருகிறது. ஆனாலும், வரித்துறை தெரிவிப்பின்படி, ஆன்லைன் பரிவர்த்தனை இருந்ததோ இல்லையோ, வருமான வரம்பு மீறினால் ஜி.எஸ்.டி. கட்டாயம்.
இந்நிலையில், ஜி.எஸ்.டி. எதிர்ப்பு நடவடிக்கையாக வரும் 23, 24 ஆம் தேதிகளில் கடைகள் மூடப்படும் என தொழிலாளர் கவுன்சில் அறிவித்துள்ளது. 25ம் தேதி சுதந்திர பூங்காவில் போராட்டம் நடத்த உள்ளதாகவும் தெரிவித்துள்ளது. இதனால், அத்தியாவசிய பொருட்களின் கிடைக்கும் நிலை குறித்து பொதுமக்கள் கவலை அடைந்துள்ளனர்.
வணிக வரித்துறை தரப்பில், கியூ.ஆர். ஸ்கேனர் அகற்றுவது எந்த பலனும் தராது என சுட்டிக்காட்டப்பட்டுள்ளது. மேலும், ஜி.எஸ்.டி. பதிவு அவசியம் என்றும், வருமானம் ரூ.1.5 கோடியில் குறைவாக இருந்தால் சமரச வரி திட்டத்தில் பதிவு செய்து, மத்திய, மாநில அரசுகளுக்கு 0.5% வீதம் செலுத்தலாம் என்றும் அறிவுறுத்தியுள்ளது. தற்போது 98,915 வியாபாரிகள் இந்த திட்டத்தில் பதிவு செய்து வரி செலுத்தி வருகின்றனர்.
