புதுடில்லி: யுபிஐ பரிவர்த்தனைகள் குறித்து சமூகத்தில் பரவி வரும் சந்தேகங்களுக்கு பதிலளிக்கும் வகையில், மத்திய நிதி அமைச்சகம் அதிகாரப்பூர்வமாக விளக்கம் வழங்கியுள்ளது. மாநிலங்களவை எம்.பி. அணில் குமார் யாதவ் எழுப்பிய கேள்விக்கு பதிலளிக்கும்போது, ரூ.2000க்கு மேல் யுபிஐ பரிவர்த்தனைகளுக்கு ஜிஎஸ்டி விதிக்கப்படுமா என கேட்டதற்கு தற்போதைய நிலவரப்படி அத்தகைய திட்டம் எதுவும் இல்லை என கூறப்பட்டுள்ளது.
மத்திய நிதி அமைச்சகத்தின் இணை அமைச்சர் பங்கஜ் சவுத்ரி இந்த விடயத்தில் பதிலளித்தபோது, ஜிஎஸ்டி தொடர்பான விகிதங்கள் மற்றும் விலக்குகள் அனைத்தும் ஜிஎஸ்டி கவுன்சிலின் பரிந்துரையின் அடிப்படையில் மட்டுமே அமலுக்கு வரும் என்றும், இதுவரை அவ்வகையான பரிந்துரை எதுவும் கவுன்சிலில் எட்டப்படவில்லை என்றும் தெரிவித்தார். எனவே, யுபிஐ பரிவர்த்தனைகளுக்கு தற்போது ஜிஎஸ்டி விதிக்கப்படுவதற்கான வாய்ப்பு இல்லை என இதனூடாக தெளிவுபடுத்தப்பட்டுள்ளது.
இந்த நிலையில், கர்நாடகாவில் சில சிறு வியாபாரிகளுக்கு வரி நோட்டீசுகள் வழங்கப்பட்டிருப்பதால், அவர்கள் யுபிஐ சேவையை விலக்கி பண பரிவர்த்தனையை மட்டுமே ஏற்க முடிவு செய்துள்ளனர். இது வியாபார வட்டாரங்களில் குழப்பத்தை ஏற்படுத்தியுள்ளது. யுபிஐ வசதியால் வாடிக்கையாளர்களுக்கும் வியாபாரிகளுக்கும் சிறந்த பயன்பாடு கிடைத்து வந்தது குறிப்பிடத்தக்கது.
இந்த தகவல்களின் அடிப்படையில், பரவலாகப் பேசப்படும் யுபிஐ பரிவர்த்தனைகளில் ஜிஎஸ்டி விதிக்கப்படும் என்ற கேள்விக்கு அரசு தெளிவான மறுப்பு அளித்துள்ளது. இது சிறு, குறு வியாபாரிகள் மற்றும் பொதுமக்களுக்கு நிச்சயமாக நிம்மதியளிக்கும் பதிலாகும்.
