பெங்களூரு: கர்நாடகாவில் காவிரி நீர்ப்பிடிப்பு பகுதிகளில் பெய்து வரும் கனமழையால் கிருஷ்ணராஜசாகர், கபினி அணைகளுக்கு நீர்வரத்து அதிகரித்துள்ளது. இதனால் கர்நாடக விவசாயிகள் மகிழ்ச்சி அடைந்துள்ளனர்.
கர்நாடகாவில் காவிரி நீர்ப்பிடிப்பு பகுதிகளில் உள்ள குடகு, மைசூரு, ஹாசன் மாவட்டங்களில் கடந்த 3 நாட்களாக கனமழை பெய்து வருகிறது. குடகு மாவட்டத்தில், தலைகாவிரி, பாகமண்டலா, மடிக்கேரி உள்ளிட்ட பகுதிகளில், இரவு நேரங்களில், காலை வேளையில் மழை பெய்தது. இதனால் காவிரி மற்றும் கனிகா ஆற்றில் வெள்ளப்பெருக்கு ஏற்பட்டுள்ளது.
குடோனில் பெய்து வரும் தொடர் மழையால், மண்டியாவில் காவிரியின் குறுக்கே உள்ள கிருஷ்ணராஜசாகர் அணைக்கு நீர்வரத்து அதிகரித்துள்ளது. நேற்று மாலை நிலவரப்படி வினாடிக்கு 11,150 கன அடி தண்ணீர் வந்து கொண்டிருக்கிறது. ஹாரங்கி அணைக்கு 2,362 கனஅடி தண்ணீரும், ஹேமாவதி அணைக்கு 8,445 கன அடி தண்ணீரும் வருகிறது.
இதேபோல், மைசூருவில் உள்ள கபினி அணைக்கு வினாடிக்கு 4,711 கன அடி தண்ணீர் வந்து கொண்டிருக்கிறது என காவிரி பாசன கழகம் தெரிவித்துள்ளது. கிருஷ்ண ராஜசாகர், கபினி, ஹேமாவதி, ஹாரங்கி அணைகளுக்கு நீர்வரத்து அதிகரித்துள்ளதால், அணைகளின் நீர்மட்டம் அதிகரித்துள்ளது. இது கர்நாடக விவசாயிகள் மத்தியில் மகிழ்ச்சியை ஏற்படுத்தியுள்ளது.
