திருவனந்தபுரம்: மலையாள திரையுலகில் பாலியல் புகார்கள் தொடர்பாக ஹேமா கமிட்டியின் முழு அறிக்கையும் சீலிடப்பட்ட உறையில் கேரள உயர்நீதிமன்றத்தில் தாக்கல் செய்யப்பட்டுள்ளது.
மலையாள திரையுலகின் பிரபல நடிகை ஒரு கும்பலால் காரில் கடத்தப்பட்டு பாலியல் பலாத்காரம் செய்யப்பட்டார். இந்த சம்பவம் 2017-ல் நடந்தது. இதையடுத்து 7 பேர் கொண்ட கும்பலை போலீசார் கைது செய்தனர்.
இதையடுத்து நடிகைகள் பார்வதி திருவோத்து, ரேவதி, பத்மப்ரியா, ரம்யா நம்பீசன் உள்ளிட்டோர் இணைந்து ‘உமன் இன் சினிமா கலெக்டிவ்’ என்ற குழுவை உருவாக்கினர்.
மலையாள சினிமாவில் நடிகைகள் மற்றும் பெண் கலைஞர்கள் மீதான பாலியல் துன்புறுத்தல்களுக்கு எதிராக அவர்கள் இருவரும் இணைந்து குரல் எழுப்பத் தொடங்கினர்.
2019-ல் முதல்வர் பினராயி விஜயனை சந்தித்து, பெண் கலைஞர்களுக்கு எதிரான பாலியல் துன்புறுத்தல்களுக்கு முடிவு கட்ட வேண்டும் என வலியுறுத்தி, ஓய்வு பெற்ற நீதிபதி தலைமையில் விசாரணைக்கு உத்தரவிட வேண்டும் என வலியுறுத்தினர்.
அதன்படி, ஓய்வுபெற்ற நீதிபதி ஹேமா தலைமையில் விசாரணைக் குழு நியமிக்கப்பட்டது. இந்த குழுவில் பழம்பெரும் நடிகை சாரதா, ஓய்வுபெற்ற ஐஏஎஸ் அதிகாரி வல்சலா குமாரி ஆகியோர் உறுப்பினர்களாக இருந்தனர்.
முன்னணி நடிகைகள் உட்பட 53 பெண் கலைஞர்களிடம் விசாரணை நடத்தி 2019 டிசம்பரில் அறிக்கை சமர்பித்தனர். ஆனால் கடந்த 5 ஆண்டுகளாக மலையாள நடிகர்கள், தயாரிப்பாளர்கள், இயக்குனர்கள் இந்த அறிக்கையை வெளியிடவில்லை. இதையடுத்து, இந்த அறிக்கையை வெளியிடக் கோரி பலரும் தகவல் அறியும் உரிமைச் சட்டத்தின் மூலம் கோரிக்கை விடுத்து வந்தனர்.
இதை விசாரித்த கேரள தகவல் அறியும் உரிமை ஆணையம், ஹேமா கமிட்டி அறிக்கையை வெளியிட கேரள அரசுக்கு உத்தரவிட்டது. இதையடுத்து ஹேமா கமிட்டியின் அறிக்கை வெளியிடப்பட்டது.
இந்த அறிக்கை கேரளாவை மட்டுமின்றி இந்திய திரையுலகையும் உலுக்கியது. இந்நிலையில், ஹேமா கமிட்டியின் முழு அறிக்கையும் கேரள உயர்நீதிமன்றத்தில் இன்று சீலிடப்பட்ட உறையில் தாக்கல் செய்யப்பட்டுள்ளது.
