மும்பை: மகாராஷ்டிரா சட்டப் பேரவைக்கு வரும் 20-ம் தேதி ஒரே கட்டமாக தேர்தல் நடைபெறுகிறது. இந்தத் தேர்தலில் பாஜக, ஏக்நாத் ஷிண்டே தலைமையிலான சிவசேனா, அஜித் பவார் தலைமையிலான தேசியவாத காங்கிரஸ் ஆகிய கட்சிகள் மகாயுதி கூட்டணியில் தேர்தலைச் சந்திக்கும். இதேபோல், எதிர் தரப்பில் காங்கிரஸ், உத்தவ் தாக்கரே தலைமையிலான சிவசேனா, சரத் பவார் தலைமையிலான தேசியவாத காங்கிரஸ் ஆகிய கட்சிகள் மகா விகாஸ் அகாதி (எம்விஏ) கூட்டணியில் உள்ளன.
இந்த தேர்தலில் யாருக்கு வெற்றி வாய்ப்பு? அக்., 10 மற்றும் நவ., 9-க்கு இடையில் 1,09,000 பேரிடம் கருத்துக் கணிப்பு நடத்தியது. அதன் அடிப்படையில் ஆய்வு நிறுவனம் முடிவுகளை வெளியிட்டுள்ளது. அதில் கூறப்பட்டுள்ளதாவது:- மகாராஷ்டிராவில் மொத்தமுள்ள 288 சட்டமன்றத் தொகுதிகளுக்கான தேர்தலில் ஆளும் மகாயுதி கூட்டணி 145 முதல் 165 இடங்களைப் பெறும் என கருத்துக் கணிப்புகள் தெரிவிக்கின்றன. இதற்கிடையில், மகா விகாஸ் அகாடி கூட்டணி 106 முதல் 126 இடங்களை மட்டுமே பெறும்.
மகாயுதி கூட்டணி 47 சதவீத வாக்குகளையும், மஹா விகாஸ் அகாதி 41 சதவீத வாக்குகளையும் பெறும். அதே சமயம் இந்த தேர்தலில் சிறிய கட்சிகள் மொத்தம் 12 சதவீத வாக்குகளை பெறும். மஹாயுதி கூட்டணியில் இடம் பெற்றுள்ள பாஜக, மேற்கு மகாராஷ்டிரா, விதர்பா மற்றும் தானே-கொங்கன் பகுதிகளில் அதிக செல்வாக்கு பெற்றுள்ளது. வடக்கு மகாராஷ்டிரா மற்றும் மராத்வாடாவில் காங்கிரஸ் கூட்டணி அதிக வாக்குகளைப் பெறும். இவ்வாறு சர்வேயில் தெரிவிக்கப்பட்டுள்ளது.
ஜார்க்கண்ட் மாநிலத்தில் நடைபெற உள்ள சட்டசபை தேர்தலில் மொத்தம் உள்ள 81 இடங்களில் பாஜக தலைமையிலான என்டிஏ கூட்டணி 45-50 இடங்களை கைப்பற்றும் என அந்த நிறுவனம் நடத்திய சர்வேயில் தெரியவந்துள்ளது. இதற்கிடையில், ஜார்க்கண்ட் முக்தி மோர்ச்சா-காங்கிரஸ் இந்தியா கூட்டணி 18-25 இடங்களை மட்டுமே வெல்ல வாய்ப்புள்ளதாக கூறப்படுகிறது. ஜார்க்கண்ட் மாநில சட்டப்பேரவைத் தேர்தலில் என்டிஏ கூட்டணி பாஜக 68 இடங்களிலும், அனைத்து ஜார்க்கண்ட் மாணவர் சங்கம் (ஏஜேஎஸ்யு) 10 இடங்களிலும், ஜனதா தளம் யுனைடெட் (ஜேடியு) 2 இடங்களிலும், லோக் ஜனசக்தி கட்சி ஒரு இடத்திலும் போட்டியிடுகின்றன.
