நியூயார்க் நகரில் நடைபெற்ற ஐக்கிய நாடுகள் பொதுச் சபையின் 80வது அமர்வில், இந்திய வெளியுறவுத்துறை அமைச்சர் ஜெய்சங்கர் தீவிரவாதத்தை எதிர்த்து உறுதியான உரையாற்றினார். தனது உரையை “பாரத மக்களிடமிருந்து நமஸ்காரம்” என்று தொடங்கிய அவர், உலகளாவிய பயங்கரவாதத்தின் மூல காரணம் எங்கள் அண்டை நாடு என்று நேரடியாக பாகிஸ்தானை சாடினார். பல தசாப்தங்களாக நடந்த முக்கியமான சர்வதேச தாக்குதல்கள் அந்த நாடிலிருந்துதான் வந்துள்ளதாகவும் அவர் வலியுறுத்தினார்.
இந்த ஆண்டு ஏப்ரலில் பஹல்காமில் சுற்றுலாப் பயணிகள் உயிரிழந்த சம்பவத்தை குறிப்பிட்ட ஜெய்சங்கர், இது எல்லை தாண்டிய காட்டுமிராண்டித்தனத்தின் இன்னொரு உதாரணம் என்றார். இந்தியா தனது மக்களை பாதுகாக்க உரிமையைப் பயன்படுத்தி, பயங்கரவாதிகளையும், அவர்களுக்கு ஆதரவு தருபவர்களையும் நீதியின் முன் நிறுத்தியது எனவும் விளக்கினார். தீவிரவாதத்தை ஆதரிக்கும் நாடுகள் மீது கடுமையான நடவடிக்கை எடுக்கப்பட வேண்டும் என்ற கோரிக்கையையும் வலியுறுத்தினார்.
அவரது உரையில், பயங்கரவாதிகள் அரசுக் கொள்கையாக ஆதரிக்கப்படுவது, வெளிப்படையாக மகிமைப்படுத்தப்படுவது உலக அமைதிக்கு பெரிய சவால் என சுட்டிக்காட்டினார். பயங்கரவாதத்திற்கு நிதியளிப்பது தடுக்கப்பட வேண்டும், அதேசமயம் அமைதியை நிலைநிறுத்த எந்த முயற்சிக்கும் இந்தியா பங்கெடுக்க தயாராக இருப்பதாகவும் தெரிவித்தார். பயங்கரவாதம் மீது இடைவிடாத அழுத்தம் மட்டுமே பிரச்சனையை தீர்க்கும் என அவர் வலியுறுத்தினார்.
சகிப்பு தன்மை காட்டாமல் எல்லைகளை வலுப்படுத்தவும், வெளிநாடுகளில் வாழும் இந்திய சமூகத்தின் நலன்களைப் பாதுகாக்கவும் இந்தியா உறுதியுடன் இருப்பதாக அவர் கூறினார். மேலும், ஐநா பாதுகாப்பு கவுன்சில் விரிவாக்கம் அவசியம் எனவும், இந்தியா அதிக பொறுப்புகளை ஏற்கத் தயாராக இருப்பதாகவும் அறிவித்தார். அவரது உரை, உலகளாவிய தீவிரவாத எதிர்ப்பு நிலைப்பாட்டில் இந்தியாவின் உறுதியையும், பாகிஸ்தானின் பங்கையும் வெளிக்கொணந்தது.
