புது டெல்லி: பிரதமர் நரேந்திர மோடி, உள்துறை அமைச்சர் அமித் ஷா மற்றும் பிற தலைவர்கள் சுவாமி விவேகானந்தரின் பிறந்தநாளில் அவருக்கு அஞ்சலி செலுத்தினர். பிரதமர் நரேந்திர மோடி பதிவிட்ட ட்வீட்டில், “சுவாமி விவேகானந்தரின் பிறந்தநாளில் அவருக்கு அஞ்சலி செலுத்துகிறோம். இளைஞர்களுக்கு ஒரு நித்திய உத்வேகமாக இருந்த அவர், இளம் மனங்களில் ஆர்வத்தையும் லட்சியத்தையும் தொடர்ந்து தூண்டி வருகிறார்.
வலுவான மற்றும் வளர்ந்த இந்தியா என்ற அவரது தொலைநோக்கு பார்வையை நிறைவேற்ற நாங்கள் உறுதிபூண்டுள்ளோம்” என்று அவர் கூறினார். மத்திய உள்துறை அமைச்சர் அமித் ஷா ஒரு பதிவில், “சுவாமி விவேகானந்தரின் பிறந்தநாளில் அவருக்கு எனது மனமார்ந்த அஞ்சலிகள். நாட்டின் அனைத்து மக்களுக்கும் ‘தேசிய இளைஞர் தின’ வாழ்த்துக்கள். சுவாமி விவேகானந்தர் நாட்டு மக்களுக்கு அவர்களின் சொந்த கலாச்சாரத்தைப் பற்றி விழிப்புணர்வு ஏற்படுத்தியது மட்டுமல்லாமல், வேதாந்தம் மற்றும் யோகாவை அடிப்படையாகக் கொண்ட தனது தத்துவத்தால் உலகையே பாதித்தார்.
ராமகிருஷ்ணா மிஷன் மூலம், ‘மனிதனுக்குச் சேவை செய்வது கடவுளுக்குச் சேவை’ என்று கூறி இரண்டையும் ஒன்றிணைத்தார். இளைஞர்களிடையே குணநலன் மற்றும் சுயமரியாதை விதைகளை விதைத்து, தேசத்தைக் கட்டியெழுப்ப அவர்களை ஊக்குவித்த சுவாமி விவேகானந்தரின் வாழ்க்கை மற்றும் தத்துவம் அனைவருக்கும் ஒரு உத்வேகமாகும்.” தேசிய இளைஞர் தினத்தை முன்னிட்டு மத்திய இணையமைச்சர் எல். முருகன் தனது செய்தியில், “இந்தியாவிற்கு மட்டுமல்ல, உலகின் பல்வேறு நாடுகளுக்கும் பயணம் செய்து, தனது சொற்பொழிவுகள் மூலம் இளைஞர்களை ஊக்கப்படுத்திய ஒரு “கர்மயோகி” முருகன் என்று கூறினார்.
“ஆன்மீகம்” நமது கலாச்சாரத்தையும் பாரம்பரியத்தையும் பாதுகாப்பதற்கான முதன்மையான ஆதாரம் என்பதை உறுதியாக வலியுறுத்திய “சுவாமி விவேகானந்தரின்” பிறந்தநாள் இன்று. இந்தியா “தேசிய இளைஞர் தினமாக” ஏற்றுக்கொண்ட இந்த புனிதமான நாளில், அவர் நமக்கு வழங்கிய பொன்னான வார்த்தைகள் மூலம் தேசத்தை வலுப்படுத்துவோம்.” பாஜக மாநிலத் தலைவர் அண்ணாமலை வெளியிட்டுள்ள செய்தியில், “தனது ஆழ்ந்த ஆன்மீகம் மற்றும் தேசபக்தி உரைகள் மூலம் இளைஞர்களை ஊக்கப்படுத்தி, அவர்களை சிறந்த சிந்தனையாளர்களாகவும் தலைவர்களாகவும் மாற்றிய துணிச்சலான துறவி சுவாமி விவேகானந்தரின் பிறந்தநாள் இன்று.
இந்தியாவின் ஆன்மீகம் மற்றும் கலாச்சாரத்தின் பெருமையை உலக அரங்கிற்கு எடுத்துச் சென்ற அவர், ஒரு ஆன்மீக வழிகாட்டியாகவும், முழு நாட்டிற்கும் ஒளியின் கலங்கரை விளக்கமாகவும் இருந்தார். இளைஞர்களிடையே தன்னம்பிக்கையை ஏற்படுத்திய அவரது பிறந்தநாள் இன்று தேசிய இளைஞர் தினமாகக் கொண்டாடப்படுகிறது. நாட்டிற்காகவும், பொது மக்களின் முன்னேற்றத்திற்காகவும் தனது வாழ்க்கையை அர்ப்பணித்த, பக்தி மற்றும் சேவையின் அடையாளமாகவும் விளங்கும் சுவாமி விவேகானந்தருக்கு அவரது பிறந்தநாளில் அஞ்சலி செலுத்துகிறோம்.”
அமமுக பொதுச் செயலாளர் டிடிவி தினகரன் வெளியிட்டுள்ள அஞ்சலி செய்தியில், “இந்தியாவின் தலைசிறந்த ஆளுமைகளில் ஒருவரும், நாட்டு மக்களின் முழுமையான விடுதலைக்காக தனது முழு வாழ்க்கையையும் அர்ப்பணித்த வீரதீர துறவியுமான சுவாமி விவேகானந்தரின் பிறந்தநாள் இன்று. இந்த நாளில், இளைஞர்களுக்கு வழிகாட்டியாக இருந்த விவேகானந்தரின் உயர்ந்த சிந்தனைகளைப் பின்பற்ற உறுதியேற்போம். அவர் உறுதியுடன் உழைத்தால், உறுதியின் முன் மலைகள் கூட இடிந்து விழும், எந்த இலக்கையும் எளிதாக அடைய முடியும்” என்று கூறியுள்ளார்.
