புதுடில்லி: இந்திய மாநில முதல்வர்களின் சொத்து மதிப்புகள் குறித்து ஜனநாயக சீர்திருத்த அமைப்பு (ADR) வெளியிட்டுள்ள சமீபத்திய அறிக்கை பெரும் கவனத்தை ஈர்த்துள்ளது. இந்த பட்டியலில் ஆந்திர பிரதேச முதல்வர் சந்திரபாபு நாயுடு முதலிடத்தில் இருக்கிறார்.
அவரின் மொத்த சொத்து மதிப்பு ரூ.931 கோடி என பதிவாகியுள்ளது. அரசியலுக்கு வருவதற்கு முன்பே தொடங்கிய பால் உற்பத்தி நிறுவனம் இவரது சொத்து உயர்வுக்கு முக்கிய காரணமாக அமைந்துள்ளது. அந்த நிறுவனத்தின் பெரும்பாலான பங்குகள் அவரது குடும்பத்தினரிடம் உள்ளது. அவரது மனைவி புவனேஸ்வரி மட்டும் 24.37 சதவீத பங்குகளை வைத்துள்ளார்.
அருணாச்சல பிரதேச முதல்வர் பெமா காண்டு ரூ.332 கோடி சொத்துகளுடன் இரண்டாம் இடத்தில் உள்ளார். அதேசமயம் ஜம்மு காஷ்மீர் முதல்வர் உமர் அப்துல்லா ரூ.55 லட்சம் சொத்துகளுடன் மிகக் குறைந்த மதிப்பில் காணப்படுகிறார். கேரள முதல்வர் பினராயி விஜயன் ரூ.1 கோடி சொத்துகளுடன் கடைசியில் இருந்து மூன்றாவது இடத்தில் உள்ளார்.
தமிழக முதல்வர் மு.க. ஸ்டாலினின் சொத்து மதிப்பு ரூ.8 கோடியே 88 லட்சம் என குறிப்பிடப்பட்டுள்ளது. அவருக்கு எந்தக் கடனும் இல்லை என அறிக்கை தெரிவிக்கிறது.
இந்த பட்டியலில் ஆச்சரியப்பட வைக்கும் விஷயம் மேற்கு வங்க முதல்வர் மம்தா பானர்ஜி குறித்து. இவர் ரூ.15 லட்சம் சொத்துகளுடன் பட்டியலில் கடைசியில் உள்ளார். 2016ம் ஆண்டு இவரிடம் ரூ.30.4 லட்சம் சொத்துக்கள் இருந்த நிலையில், தற்போது அதுவே பாதியாக குறைந்துள்ளது.
மொத்தத்தில் 31 மாநில முதல்வர்கள் பற்றிய தகவல்களும் இதில் இடம்பெற்றுள்ளன. இவர்களின் மொத்த சொத்து மதிப்பு ரூ.1,630 கோடியாக கணக்கிடப்பட்டுள்ளது.
டாப் 10 முதல்வர்கள் பட்டியல் பின்வருமாறு:
- சந்திரபாபு நாயுடு – ரூ.931 கோடி
- பெமா காண்டு – ரூ.332 கோடி
- சித்தராமையா – ரூ.51 கோடி
- நெய்பு ரியோ – ரூ.46 கோடி
- மோகன் யாதவ் – ரூ.42 கோடி
- ரங்கசாமி – ரூ.38 கோடி
- ரேவந்த் ரெட்டி – ரூ.30 கோடி
- ஹேமந்த் சோரன் – ரூ.25 கோடி
- ஹிமந்தா பிஸ்வா சர்மா – ரூ.17 கோடி
- கான்ராட் சங்மா – ரூ.14 கோடி
இந்த விவரங்கள் இந்திய அரசியலின் செல்வச் சீர்மாறுகளை வெளிப்படுத்துகின்றன. ஒருபுறம் நூற்றுக்கணக்கான கோடிகளை வைத்துள்ளவர்கள் இருக்க, மறுபுறம் சில லட்சம் ரூபாயுடன் மட்டுமே உள்ளவர்கள் உள்ளனர்.
