வரவிருக்கும் பீஹார் சட்டசபை தேர்தலை முன்னிட்டு, அரசியல் சூடுபிடித்து வருகிறது. பா.ஜ.,-நிதிஷ் கூட்டணி ஒருபுறம் வலுவாக செயல்படும் நிலையில், எதிர்க்கட்சியான லாலு பிரசாத் யாதவின் ராஷ்ட்ரீய ஜனதா தளம் மற்றும் காங்கிரஸ் கூட்டணியில் குடும்ப சிக்கல்கள் தலைதூக்கியுள்ளன. லாலுவின் மூத்த மகன் தேஜ் பிரதாப், தனது தம்பி தேஜஸ்வி யாதவுக்கு எதிராக வெளிப்படையாக களம் இறங்கியிருக்கிறார்.
தேஜ் பிரதாப், கடந்த காலத்தில் சமூக ஊடகங்களில் சர்ச்சையான பதிவுகளை வெளியிட்டதால் கட்சியில் இருந்து நீக்கப்பட்டார். தற்போது, வெள்ளத்தால் பாதிக்கப்பட்ட ராககோபூர் தொகுதியில் நிவாரணப் பொருட்களை வழங்கி, தனது தம்பி எம்.எல்.ஏ.வாக இருந்தும் மக்களை பார்க்க வரவில்லை என குற்றம்சாட்டினார். “உங்கள் பிரதிநிதி இல்லாமல் இளைஞர்களுடன் பொழுதுபோக்கில் ஈடுபட்டு வருகிறார்” என்று தேஜ் பிரதாப் கூறியதால் அங்கு மக்கள் மனநிலையிலும் மாற்றம் ஏற்பட்டுள்ளது.
ராககோபூர் தொகுதி லாலு மற்றும் அவரது மனைவி ராப்ரி தேவிக்கு வலுவான இடமாக இருந்தது. இப்போது தேஜஸ்வி அங்கு எம்.எல்.ஏ.வாக இருந்தாலும், அண்ணனின் நேரடி தாக்குதல் அவருக்கு சவாலாக மாறியுள்ளது. தேஜஸ்வி “காங்கிரஸ் கூட்டணி வெற்றி பெற்றால் நான் தான் முதல்வர் வேட்பாளர்” என தெரிவிக்கையில், தேஜ் பிரதாப் அதே தளத்தில் எதிர்ப்பை வெளிப்படுத்துவது குடும்பத்தினருக்குள் பெரும் முரண்பாட்டை உருவாக்கியுள்ளது.
இந்த நிலைமை, பீஹார் அரசியலில் மேலும் குழப்பத்தை ஏற்படுத்தி உள்ளது. தேஜஸ்வி ஆதரவாளர்கள் “அண்ணனின் தாக்குதல்கள் எவ்வளவு இருந்தாலும், தேஜஸ்வி தான் இறுதியில் முதல்வர் வேட்பாளர்” என வலியுறுத்துகின்றனர். ஆனால் காங்கிரஸ் தலைவர் ராகுல் காந்தி இதுவரை இதை உறுதி செய்யவில்லை. எனவே, தேர்தல் நெருங்கும் நிலையில் அண்ணன்-தம்பி மோதல் லாலு குடும்பத்தையும், கூட்டணியையும் சிக்கலில் சிக்கவைக்கிறது.
