கர்நாடகா மாநிலத் தலைநகர் பெங்களூருவில் ஆன்மீக சுற்றுலா திட்டமாக “திவ்ய தர்ஷனா” என்ற புதிய பயண சேவையை மாநகரப் போக்குவரத்து கழகம் (BMTC) அறிமுகப்படுத்தியுள்ளது. இந்த திட்டம் இன்று மே 31 முதல் செயல்பாட்டில் வருகிறது. வார இறுதி நாட்களான சனி மற்றும் ஞாயிறு ஆகிய தினங்களிலும், பொது விடுமுறைகளிலும் இந்த சேவையைக் கொண்டு பயணிகள் முக்கிய ஆன்மீக தலங்களைச் சுற்றிப் பார்வையிட முடியும்.
பெங்களூருவில் கோயில்கள், புனித தலங்கள் மற்றும் பாரம்பரிய அடையாளங்களை கொண்ட இடங்கள் அதிகமாக உள்ளன. இந்த ஒரு நாள் சுற்றுலா திட்டம் பக்தர்கள் மற்றும் ஆன்மீக ஆர்வலர்களுக்காக உருவாக்கப்பட்டுள்ளது. இந்த பயணத்திற்காக ஏசி பேருந்துகள் பயன்படுத்தப்படும். பயணம் பெங்களூருவின் மையமான கெம்பகவுடா பேருந்து நிலையத்தில் (மெஜஸ்டிக்) காலை 8.30 மணிக்கு துவங்கி, மாலை 6 மணிக்கு முடிவடைகிறது.
இந்த சுற்றுலா பயணத்தின் போது, ஸ்ரீ காளி ஆஞ்சநேயர் கோயில், ஸ்ரீ ராஜராஜேஸ்வரி கோயில், ஷ்ருங்காகிரி ஸ்ரீ ஷண்முக சுவாமி கோயில், தேவி கருமாரியம்மன் கோயில், ஓம்கார் மலை கோயில், இஸ்கான் வைகுண்டா கோயில் (வசந்தபுரா), ஆர்ட் ஆஃப் லிவிங் மற்றும் பனசங்கரி கோயில் உள்ளிட்ட முக்கியமான தலங்களுக்கு அழைத்து செல்லப்படுவர்.
பயண கட்டணமாக பெரியவர்களுக்கு ரூ.450, சிறுவர்களுக்கு ரூ.350 என நிர்ணயிக்கப்பட்டுள்ளது. இந்த சேவைக்கு முன்பதிவு தேவையானதா என்பதை உறுதி செய்யும் வகையில் www.ksrtc.in என்ற இணையதளத்தின் மூலம் முன்பதிவு செய்யலாம். மேலும் விவரங்களுக்கு 080-22483777 அல்லது 7760991170 என்ற தொலைபேசி எண்களில் தொடர்புகொள்ளலாம்.
இந்த புதிய திட்டம் பெங்களூருவில் ஆன்மீக பயணத்தை விரும்பும் மக்களிடம் பெரும் வரவேற்பைப் பெறும் என எதிர்பார்க்கப்படுகிறது. குறிப்பாக குடும்பத்துடன் பயணம் மேற்கொள்ள விரும்பும் பொதுமக்களுக்கு இது ஒரு சிறந்த வாய்ப்பாகும். மெஜஸ்டிக் பஸ்ஸ்டாண்டிலிருந்து மட்டும் புறப்படும் இந்த பயணத்தை நகரத்தின் பிற பகுதிகளையும் இணைக்கும் வகையில் விரிவுபடுத்த வேண்டும் என பொதுமக்கள் கோரிக்கை விடுத்துள்ளனர்.
இதற்கு முன் அறிமுகப்படுத்தப்பட்ட பெங்களூரு தர்ஷினி மற்றும் இஷா பவுண்டேஷன் சுற்றுலா திட்டங்கள் மக்கள் மத்தியில் நல்ல வரவேற்பைப் பெற்றிருந்தன. அந்த வெற்றியைத் தொடர்ந்து தற்போது அறிமுகமாகும் திவ்ய தர்ஷனா திட்டம் வருடாந்தம் பல்லாயிரக்கணக்கான பயணிகளை கவரும் என கருதப்படுகிறது. ஆன்மீக விருப்பமுள்ளவர்களுக்கு இது ஒரு அருமையான வாய்ப்பு என்றும் அதிகாரிகள் தெரிவிக்கின்றனர்.
