எச்5என்1 பறவைக் காய்ச்சல் என்று அழைக்கப்படுகிறது. பறவைகள், மாடுகள் உள்ளிட்ட பாலூட்டிகளுக்கும் பரவுகிறது. மனிதர்களுக்கு பரவுவது அரிதாகவே சாத்தியம் என்று நிபுணர்கள் கூறியுள்ளனர். இந்த வைரஸ் 2021, 2023 மற்றும் 2024-ம் ஆண்டுகளில் சில மாநிலங்களுக்கு பரவியது. இந்த வைரஸால் கோழிகள் மற்றும் பறவைகள் பாதிக்கப்பட்டன.
இந்நிலையில் கடந்த மாதம் மகாராஷ்டிரா மாநிலம் சந்திரபூர் மாவட்டம் மாங்கிலி கிராமத்தில் உள்ள கோழிப்பண்ணையில் கோழிகள் இறந்தன. அவர்களின் மாதிரிகளை சோதனை செய்ததில் எச்5என்1 வைரஸ் பரவியது தெரியவந்தது. இந்நிலையில், இந்திய மருத்துவ ஆராய்ச்சி கவுன்சில் (ஐசிஎம்ஆர்) இந்த வைரஸ் தொற்றுக்கு உள்நாட்டிலேயே தடுப்பு மருந்தை உருவாக்கும் முயற்சியில் ஈடுபட்டுள்ளது.
ஐசிஎம்ஆர் வெளியிட்டுள்ள அறிக்கையில், “எச்5என்1 வைரஸ் தொற்று பரவாமல் தடுக்க மருந்து நிறுவனங்களுடன் இணைந்து தடுப்பூசியை உருவாக்க ஐசிஎம்ஆர் முடிவு செய்துள்ளது. அவ்வாறு ஒத்துழைக்கும் நிறுவனங்களுக்கு விரைவில் மருந்து தயாரித்து விற்பனை செய்ய அனுமதி வழங்கப்படும்” என்று தெரிவிக்கப்பட்டுள்ளது.
