பிரதமர் நரேந்திர மோடி, டில்லியில் நடைபெற்ற நிகழ்ச்சியில், மத்திய வீட்டு வசதித் துறை மற்றும் கல்வித் துறையின் பல்வேறு திட்டங்களை துவக்கி வைத்தார். ‘ஸ்வாபிமான்’ திட்டத்தின் கீழ், புதுடில்லி அசோக் விஹாரில் குடிசைவாசிகளுக்காக அடுக்கு மாடி வீடுகள் கட்டப்பட்டு பயனாளிகளுக்கு வழங்கப்பட்டது.
பேச்சின் போது மோடி, நாடு முழுவதும் ஏழைகளுக்கு நான்கு கோடிக்கும் அதிகமான வீடுகளை கட்டியுள்ளதாகவும், ஆனால் தனக்காக ஒரு வீடு கூட கட்டவில்லை என உருக்கமாக கூறினார். அவர் பிரமாண்ட மாளிகையை கட்டும் வாய்ப்பு இருந்தபோதிலும், அது செய்யாததைக் குறிப்பிட்டார்.
டில்லி கடந்த 10 ஆண்டுகளாகப் பேரழிவில் சிக்கியுள்ளதாகவும், ஆம் ஆத்மி ஆட்சியின் தவறுகளை சுட்டிக்காட்டினார். சமூக சேவகர் அன்னா ஹசாரேயின் போராட்டத்தை பின்னணியாக கொண்டு, சில மோசமானவர்களின் செயல்பாடுகள் டில்லியை பேரழிவுக்குத் தள்ளியதாக மோடி குற்றம் சாட்டினார்.மத்திய அரசு, டில்லியின் வளர்ச்சிக்காக பல திட்டங்களை செயல்படுத்தியுள்ள போதிலும், டில்லி அரசு பொய்கள் மற்றும் ஊழலுடன் மக்கள் நலத்துக்கு விரோதமாக செயல்பட்டதாக விமர்சித்தார்.
டில்லி சட்டசபைத் தேர்தலுக்கு தயாராகியிருக்கும் இந்த நேரத்தில், மக்கள் பா.ஜ.க.வை ஆதரிக்க வேண்டும் என மோடி அழைப்பு விடுத்தார். அவர் மக்கள் நலனை முன்னிறுத்தும் புதிய அரசியலை அறிமுகப்படுத்துவதாக உறுதியளித்தார்.துப்புரவுப் பணியாளர்களுக்கு வீட்டு சாவிகளை வழங்கிய பிரதமர், அவர்களின் நிலையை மேம்படுத்தும் முயற்சிகளை தொடர்ந்து மேற்கொள்ளப் போவதாகவும் தெரிவித்தார்.மக்கள், டில்லியை மீட்டெடுக்க பா.ஜ.க. ஆட்சியை ஆதரிக்க வேண்டும் என அவர் வலியுறுத்தினார்.
