புது டெல்லி: டெல்லியில் ரூ.11,000 கோடி மதிப்பிலான நெடுஞ்சாலைத் திட்டங்களை பிரதமர் நரேந்திர மோடி நேற்று தொடங்கி வைத்தார். அப்போது பேசிய அவர், உள்நாட்டு பொருட்களை மட்டும் விற்பனை செய்யுமாறு வர்த்தகர்களுக்கு அழைப்பு விடுத்தார். 29 கி.மீ நீளமுள்ள புதிய நெடுஞ்சாலை, தலைநகர் டெல்லியில் உள்ள சிவமூர்த்தி பாக் முதல் ஹரியானாவில் உள்ள குருகிராம் வரை செல்லும்.
இதில், ஹரியானாவில் 19 கி.மீ. சாலை கடந்த ஆண்டு மார்ச் மாதம் திறக்கப்பட்டது. இதைத் தொடர்ந்து, டெல்லியில் 10 கி.மீ. நெடுஞ்சாலைப் பணிகள் ரூ.5,360 கோடி செலவில் மேற்கொள்ளப்பட்டன. துவாரகா நெடுஞ்சாலை என்று அழைக்கப்படும் இந்த சாலையை பிரதமர் நரேந்திர மோடி நேற்று திறந்து வைத்தார். இதேபோல், டெல்லியின் அலிப்பூரில் இருந்து திச்சான் கலான் பகுதிக்கு ரூ.5,580 கோடி செலவில் நகர்ப்புற விரிவாக்க சாலை அமைக்கப்பட்டுள்ளது. டெல்லியின் 3-வது ரிங் ரோடு என்று அழைக்கப்படும் இந்த சாலையை பிரதமர் நரேந்திர மோடி நேற்று திறந்து வைத்தார்.
டெல்லியின் ரோஹிணி பகுதியில் நடைபெற்ற விழாவில் பேசிய அவர், “டெல்லியின் போக்குவரத்து உள்கட்டமைப்பை மேம்படுத்துவதற்கு மத்திய அரசு முன்னுரிமை அளிக்கிறது. புதிதாகத் திறக்கப்பட்ட இரண்டு நெடுஞ்சாலைகளால் வணிகர்கள், விவசாயிகள் மற்றும் பொதுமக்கள் பெரிதும் பயனடைவார்கள். டெல்லி மக்களின் அனைத்துப் பிரச்சினைகளும் தீர்க்கப்பட்டு வருகின்றன. குறிப்பாக, யமுனை நதி சுத்தம் செய்யப்பட்டு வருகிறது. காற்று மாசுபாட்டைக் கட்டுப்படுத்த பல்வேறு திட்டங்கள் செயல்படுத்தப்பட்டு வருகின்றன.
தற்போது, டெல்லியில் 650 மின்சார பேருந்துகள் இயக்கப்படுகின்றன. இந்த எண்ணிக்கை 2,000 ஆக அதிகரிக்கப்படும். கடந்த காங்கிரஸ் அரசாங்கத்தின் போது, மிக முக்கியமான கோப்புகள் நீண்ட காலமாக நிலுவையில் இருந்தன. பாஜக அரசாங்கத்தின் போது, கோப்புகள் விரைவாக நகர்கின்றன. வளர்ச்சித் திட்டங்கள் வேகம் பெற்றுள்ளன. கடந்த 11 ஆண்டுகளில் சாலை, ரயில் மற்றும் விமானப் போக்குவரத்து அமைப்புகள் கணிசமாக மேம்பட்டுள்ளன. ஜிஎஸ்டி விகிதங்கள் விரைவில் குறைக்கப்பட உள்ளன. எனவே, வரும் தீபாவளி சாதாரண மக்களுக்கு இரட்டை தீபாவளியாக இருக்கும்.
அனைத்து தரப்பு மக்களுக்கும் இரட்டை போனஸ் கிடைக்கும். கடந்த காலத்தில், காதி துறை பலவீனமான நிலையில் இருந்தது. பாஜக ஆட்சிக்கு வந்த பிறகு காதி துறை தொடர்ந்து வளர்ச்சியடைந்து வருகிறது. காதி விற்பனை 7 மடங்கு அதிகரித்துள்ளது. ஒரு காலத்தில், நாங்கள் வெளிநாடுகளில் இருந்து மொபைல் போன்களை இறக்குமதி செய்தோம். இப்போது, இந்தியாவில் ஒவ்வொரு ஆண்டும் சுமார் 35 கோடி மொபைல் போன்கள் தயாரிக்கப்படுகின்றன.
இவை வெளிநாடுகளுக்கும் ஏற்றுமதி செய்யப்படுகின்றன. இந்த நேரத்தில், இந்திய தொழிலதிபர்களுக்கு எனக்கு ஒரு வேண்டுகோள் உள்ளது. நீங்கள் இந்தியாவில் தயாரிக்கப்பட்ட பொருட்களை மட்டுமே விற்க வேண்டும். வெளிநாட்டு பொருட்களை விற்பனை செய்வதைத் தவிர்க்க வேண்டும். அதேபோல், அனைத்து குடிமக்களும் உள்ளூரில் தயாரிக்கப்பட்ட பொருட்களை மட்டுமே வாங்க வேண்டும் என்று அவர் கூறினார்.
