நியூசிலாந்தின் பிரதமர் கிறிஸ்டோபர் லக்சன், பதவியேற்ற பிறகு முதல் முறையாக ஐந்து நாட்கள் அரசு முறை பயணமாக இந்தியா வந்துள்ளார். இதன் ஒரு பகுதியாக, மார்ச் 17 அன்று டில்லியில் உள்ள ஹைதராபாத் இல்லத்தில் பிரதமர் மோடியை சந்தித்து பேச்சுவார்த்தை நடத்தினார். இந்த சந்திப்பில் இரு தரப்பு உறவுகளை மேம்படுத்தும் வழிகள் குறித்து விரிவாக விவாதிக்கப்பட்டன. இரு நாடுகளுக்கிடையே சில முக்கிய ஒப்பந்தங்களும் கையெழுத்தாகின. பின்னர், பிரதமர் மோடி மற்றும் கிறிஸ்டோபர் லக்சன் இருவரும் செய்தியாளர்களை சந்தித்து உரையாற்றினர்.
பிரதமர் மோடி தனது உரையில், நியூசிலாந்து பிரதமரை இந்தியா வரவேற்கிறார் என்றும், இந்தியாவுடனான அவரது நீண்ட கால தொடர்பு இருதரப்பு உறவுகளை மேலும் வலுப்படுத்தும் என்றும் தெரிவித்தார். பயங்கரவாதம், பிரிவினைவாதம் மற்றும் தீவிரவாத சக்திகளுக்கு எதிராக இந்தியா தொடர்ந்து நியூசிலாந்துடன் இணைந்து செயல்படும் என உறுதி அளித்தார். வளர்ச்சியின் கொள்கையை முன்னெடுக்கும் இந்தியா, 2026ம் ஆண்டு இரு நாடுகளுக்கிடையிலான விளையாட்டு உறவின் 100வது ஆண்டை கொண்டாடவும் திட்டமிட்டுள்ளதாகவும் கூறினார்.
சட்டவிரோத இடம்பெயர்வு பிரச்னையை தீர்க்கும் வழிகள் குறித்து கலந்துரையாடியதாகவும், எதிர்காலத்தில் இரு நாடுகளுக்கும் இடையேயான வர்த்தகம், கல்வி, தொழில்நுட்பம் போன்ற துறைகளில் ஒத்துழைப்பை மேலும் விரிவுபடுத்த முடிவு செய்துள்ளதாகவும் பிரதமர் மோடி தெரிவித்தார்.
நியூசிலாந்து பிரதமர் கிறிஸ்டோபர் லக்சன் தனது உரையில், இந்தியா-நியூசிலாந்து உறவுகளை மேலும் வலுப்படுத்த உறுதியளிப்பதாக கூறினார். பிரதமர் மோடியுடன் பல்வேறு முக்கிய விஷயங்களை விவாதித்ததாகவும், எதிர்காலத்தில் இருநாடுகளுக்கும் இடையே பல திறப்புகளை உருவாக்க நடவடிக்கை எடுக்கப்படும் என்றும் தெரிவித்தார்.
