டெல்லி: மும்மொழிப் பிரச்சினை தொடர்பாக மக்களவையில் தமிழக எம்.பி. மாணிக்கம் தாக்கூர் எழுப்பிய கேள்விக்கு மத்திய கல்வித் துறை இணையமைச்சர் ஜெயந்த் சவுத்ரி எழுத்துப்பூர்வமாக பதிலளித்துள்ளார். இது தொடர்பாக, அவர் கூறினார்; மும்மொழிக் கொள்கையை செயல்படுத்துவதற்கான வழிமுறைகள் குறித்து மாநிலங்களும் யூனியன் பிரதேசங்களும் சுதந்திரமாக முடிவு செய்யலாம்.
அரசியலமைப்பின் ஒருங்கிணைந்த பட்டியலில் கல்வி ஒரு பாடமாக இருப்பதால், தேசிய கல்விக் கொள்கை 2020-ன் சாராம்சம் மற்றும் பரிந்துரைகளின்படி, மும்மொழிக் கொள்கையை செயல்படுத்துவதற்கான வழிமுறைகள் குறித்து அந்தந்த மாநில மற்றும் யூனியன் பிரதேச அரசுகள் முடிவு செய்ய வேண்டும் என்று அவர் மக்களவையில் தெரிவித்தார்.
பன்மொழிப் பண்பாட்டை ஊக்குவிப்பதை இந்தக் கொள்கை வலியுறுத்துகிறது, மேலும் உள்ளூர் தேவைகள், மொழியியல் பன்முகத்தன்மை மற்றும் சாத்தியக்கூறுகளைக் கருத்தில் கொண்டு, மும்மொழிக் கொள்கையை நெகிழ்வான முறையில் ஏற்றுக்கொள்ள மாநிலங்கள்/யூனியன் பிரதேசங்கள் ஊக்குவிக்கப்படுகின்றன என்று அவர் கூறினார்.
அரசியலமைப்பு விதிகளை மனதில் கொண்டு மும்மொழிக் கொள்கை தொடர்ந்து செயல்படுத்தப்படும் என்றும், ஆனால் “மும்மொழிக் கொள்கையில் அதிக நெகிழ்வுத்தன்மை இருக்கும், எந்த மாநிலத்தின் மீதும் எந்த மொழியும் திணிக்கப்படாது” என்றும் கூறும் NEP 2020-ல் உள்ள ஒரு விதியையும் அவர் மேற்கோள் காட்டினார். மும்மொழிக் கொள்கைக்கு நாடு தழுவிய எதிர்ப்பு எழுந்ததால் மத்திய அரசு பின்வாங்கியது.
