புதுடில்லி: தமிழகத்தில் டாஸ்மாக் தலைமை அலுவலகம் மற்றும் அதனைச் சேர்ந்த அதிகாரிகள் மற்றும் ஊழியர்களின் வீடுகளில் அமலாக்கத்துறை நடத்திய சோதனையை எதிர்த்து, உச்சநீதிமன்றத்தில் தாக்கல் செய்யப்பட்டுள்ள மேல்முறையீட்டு மனுவை விரைந்து பட்டியலிட தமிழக அரசு பதிவாளரிடம் முறையிட்டுள்ளது.
சென்னை எழும்பூரில் உள்ள டாஸ்மாக் தலைமையகம் மற்றும் மதுபான ஆலை நிர்வாகிகளின் வீடுகளில் கடந்த மார்ச்சில் நடந்த சோதனையில், பல முக்கிய ஆவணங்கள் கைப்பற்றப்பட்டதாக அமலாக்கத்துறை தெரிவித்தது. இதற்கெதிராக தமிழக அரசு மற்றும் டாஸ்மாக் நிர்வாகம் சென்னை உயர் நீதிமன்றத்தில் வழக்கு தொடர்ந்திருந்தனர்.
இந்த வழக்கை விசாரித்த உயர்நீதிமன்றம், அமலாக்கத்துறையின் நடவடிக்கை சட்டத்திற்கும், குற்றவியல் நீதி முறைக்கும் ஏற்பதாகும் எனத் தெரிவித்து, அந்த வழக்கை தள்ளுபடி செய்தது. அரசு தரப்பில் வலியுறுத்தப்பட்ட ‘அமலாக்கத்துறை சோதனை நடத்த அரசு அனுமதி அவசியம்’ என்ற வாதம் ஏற்க முடியாதது என்றும், இது குற்றவியல் நியாயத்தின் அடிப்படையை புறக்கணிக்கும் செயல் என்றும் நீதிமன்றம் கருத்து தெரிவித்தது.
மேலும், சோதனையின் போது பெண் அதிகாரிகள் உள்ளிட்ட ஊழியர்களை அரசே கேடயமாக பயன்படுத்தி விசாரணையைத் தடுக்கும் முயற்சி செய்திருப்பது துரதிருஷ்டகரமானது என்றும் நீதிமன்றம் கடும் விமர்சனம் செய்தது. இதைத் தொடர்ந்து அமலாக்கத்துறைக்கு விசாரணையை தொடர்ந்து நடத்த அனுமதி வழங்கப்பட்ட நிலையில், தமிழக அரசு தற்போது உச்சநீதிமன்றத்தில் மேல்முறையீட்டு மனு தாக்கல் செய்துள்ளது.
இந்த மனு, மே 23ம் தேதியுடன் தொடங்கவிருக்கும் உச்சநீதிமன்ற கோடைக்கால விடுமுறைக்கு முன் விசாரணைக்கு வர வேண்டும் என தமிழக அரசு விருப்பம் தெரிவித்துள்ளது. இதற்காக அரசு தரப்பில் உள்ள சட்டத்தரணிகள், பதிவாளரிடம் வழக்கை விரைந்து பட்டியலிட வேண்டுமென நேற்று முறையிட்டுள்ளனர். இந்த மனு மே 22ம் தேதி விசாரணைக்கு வரக்கூடும் என எதிர்பார்க்கப்படுகிறது.
