புதுடெல்லி: உள்ளூர் நாட்டுப்புறக் கதைகளை பல்வேறு மொழிகளில் மாணவர்களுக்கு கற்றுத் தருமாறு ஆசிரியர்களுக்கு பிரதமர் நரேந்திர மோடி அறிவுறுத்தியுள்ளார்.
தேசிய நல்லாசிரியர் விருது பெற்ற ஆசிரியர்களுடன் பிரதமர் நரேந்திர மோடி இன்று தனது இல்லத்தில் கலந்துரையாடினார். விருது பெற்றவர்கள் தங்களது கற்பித்தல் அனுபவங்களை பிரதமரிடம் பகிர்ந்து கொண்டனர்.
கற்றலை மேலும் சுவாரஸ்யமாக்க அவர்கள் பயன்படுத்தும் சுவாரசியமான நுட்பங்களைப் பற்றியும் சொன்னார்கள். அவர்கள் தங்கள் வழக்கமான கற்பித்தல் பணியுடன் அவர்கள் செய்யும் சமூகப் பணிகளின் உதாரணங்களையும் பகிர்ந்து கொண்டனர்.
அவர்களுடன் உரையாடிய பிரதமர், கற்பித்தல் கலையில் அவர்களின் அர்ப்பணிப்பையும், பல ஆண்டுகளாக அவர்கள் காட்டிய குறிப்பிடத்தக்க ஆர்வத்தையும் பாராட்டினார்.
இந்த விருதுகள் மூலம் இது அங்கீகரிக்கப்பட்டுள்ளதாக அவர் குறிப்பிட்டுள்ளார். தேசியக் கல்விக் கொள்கையின் தாக்கத்தைப் பற்றி விவாதித்த பிரதமர், ஒவ்வொருவரும் தங்கள் தாய்மொழியில் கல்வி பெறுவதன் முக்கியத்துவத்தையும் வலியுறுத்தினார்.
உள்ளூர் நாட்டுப்புறக் கதைகளை பல்வேறு மொழிகளில் மாணவர்களுக்கு ஆசிரியர்கள் கற்பிக்க வேண்டும் என்று அவர் பரிந்துரைத்தார். இதன் மூலம், மாணவர்கள் பல மொழிகளை கற்று, இந்தியாவின் துடிப்பான கலாச்சாரத்தை அறிந்து கொள்ளலாம், என்றார்.
இந்தியாவின் பன்முகத்தன்மையை வெளிப்படுத்த ஆசிரியர்கள் தங்கள் மாணவர்களை கல்விச் சுற்றுலாவிற்கு அழைத்துச் செல்லலாம் என்று குறிப்பிட்ட பிரதமர், இது அவர்கள் கற்கவும், அவர்கள் தங்கள் நாட்டை முழுமையான முறையில் அறிந்துகொள்ளவும் உதவும் என்றார்.
இது சுற்றுலாவை மேம்படுத்துவதோடு உள்ளூர் பொருளாதாரத்தையும் மேம்படுத்தும் என்றார். விருது பெற்ற ஆசிரியர்கள் சமூக ஊடகங்கள் மூலம் ஒருவருக்கொருவர் தொடர்பு கொள்ளவும், அவர்களின் சிறந்த நடைமுறைகளைப் பகிர்ந்து கொள்ளவும் பிரதமர் கேட்டுக்கொண்டார்.
தேசத்திற்கு ஆசிரியர்கள் மிக முக்கியமான சேவையை ஆற்றி வருவதாகவும், வளர்ந்த இந்தியாவுக்காக இன்றைய இளைஞர்களை தயார்படுத்தும் பொறுப்பு அவர்களின் கைகளில் இருப்பதாகவும் பிரதமர் கூறினார்.
