பாட்னா: பீகார் சட்டமன்றத் தேர்தல் முன்னேற்றம் குறித்து தலைமைத் தேர்தல் ஆணையர் ஞானேந்திர குமார் இன்று பாட்னாவில் ஆய்வு செய்கிறார். பீகார் சட்டமன்றத்தின் பதவிக்காலம் நவம்பர் 22-ம் தேதியுடன் முடிவடைகிறது. விரைவில் மாநிலத்தில் தேர்தல்கள் நடைபெற உள்ளன. இந்தச் சூழலில், தலைமைத் தேர்தல் ஆணையர் ஞானேந்திர குமார், தேர்தல் ஆணையர்கள் விவேக் ஜோஷி மற்றும் சுக்பீர் சிங் சந்து ஆகியோர் இன்று பீகார் தலைநகர் பாட்னாவிற்குச் சென்று தேர்தல் முன்னேற்றம் குறித்து ஆய்வு செய்கிறார்கள்.
அவர்கள் இன்றும் நாளையும் மாநில தலைமைத் தேர்தல் அதிகாரி மற்றும் மூத்த அதிகாரிகளுடன் முக்கிய ஆலோசனைகளை நடத்த உள்ளனர். இதன் அடிப்படையில், பீகார் சட்டமன்றத் தேர்தலுக்கான அறிவிப்பு வெளியிடப்படும் என்று தெரிவிக்கப்பட்டுள்ளது. பீகார் அரசியல் பார்வையாளர்கள் கூறியதாவது:- சாத் பண்டிகை அக்டோபர் 28-ம் தேதி முடிவடைகிறது. இதற்குப் பிறகுதான் தேர்தல் நடைபெறும் என்று எதிர்பார்க்கப்படுகிறது.
இந்த முறையும் இரண்டு கட்டங்களாக வாக்குப்பதிவு நடத்தப்படலாம். முதல் கட்ட தேர்தல் அக்டோபர் 31 முதல் நவம்பர் 2 வரை நடைபெறும் என எதிர்பார்க்கப்படுகிறது. இரண்டாம் கட்ட தேர்தல் நவம்பர் 5 முதல் 7 வரை நடைபெறும் என எதிர்பார்க்கப்படுகிறது. வாக்கு எண்ணிக்கை நவம்பர் 10-ம் தேதி நடைபெறும் என எதிர்பார்க்கப்படுகிறது. பீகாரில் மொத்தம் 234 தொகுதிகள் உள்ளன. தேசிய ஜனநாயக கூட்டணியின் தொகுதி பங்கீடு குறித்த முக்கிய கூட்டம் 8-ம் தேதி டெல்லியில் நடைபெறும் என எதிர்பார்க்கப்படுகிறது.
இந்தக் கூட்டத்தில் தொகுதி பங்கீடு இறுதி செய்யப்படும் என்று எதிர்பார்க்கப்படுகிறது. மெகா கூட்டணிக்கான தொகுதி பங்கீடு ஏற்பாட்டில் ராஷ்ட்ரிய ஜனதா தளம் (ஆர்ஜேடி), காங்கிரஸ் மற்றும் கம்யூனிஸ்ட் கட்சிகள் முட்டுக்கட்டை நிலையில் உள்ளன. கடந்த சட்டமன்றத் தேர்தலில், காங்கிரஸ் 70 இடங்களில் போட்டியிட்டு 19 இடங்களில் மட்டுமே வெற்றி பெற்றது. எனவே, வரவிருக்கும் தேர்தல்களில் காங்கிரசுக்கு 70 இடங்கள் ஒதுக்கப்படுவதை ஆர்ஜேடி கடுமையாக எதிர்க்கிறது.
ஆனால் காங்கிரஸ் 76 இடங்களைக் கோருகிறது. மெகா கூட்டணியில் அங்கம் வகிக்கும் விஐபி கட்சி மற்றும் கம்யூனிஸ்ட் கட்சியும் அதிக இடங்களைக் கோருவதால் குழப்பம் தொடர்கிறது என்று அரசியல் பார்வையாளர்கள் கூறுகின்றனர்.
