மகாராஷ்டிரா அரசு தனியார் துறையில் பணிபுரியும் ஊழியர்களின் பணி நேரத்தில் முக்கிய மாற்றங்களை மேற்கொள்ளத் திட்டமிட்டுள்ளது. இதன்படி, தற்போதைய வேலை நேரம் எட்டு மணிநேரத்தில் இருந்து அதிகபட்சம் பத்து மணிநேரமாக உயர்த்தப்படும். தொடர்ந்து ஆறு மணி நேரம் வேலை செய்த பின் ஊழியர்களுக்கு முப்பது நிமிட ஓய்வு வழங்கப்படும் என்றும் அரசின் பரிந்துரையில் குறிப்பிடப்பட்டுள்ளது. அவசர நிலை ஏற்படும் சூழ்நிலையில் ஊழியர்கள் பன்னிரண்டு மணி நேரம் வரை வேலை செய்ய அனுமதி வழங்கப்படலாம்.
முன்னர், மூன்று மாதங்களில் அனுமதிக்கப்பட்ட அதிக நேர வேலை 125 மணி நேரமாக இருந்தது. புதிய விதிமுறையின் கீழ் இது 144 மணிநேரமாக உயர்த்தப்படுகிறது. இந்த புதிய மாற்றங்கள் குறைந்தபட்சம் இருபது பேருக்கு மேற்பட்ட பணியாளர்களை கொண்ட நிறுவனங்களுக்கு மட்டுமே பொருந்தும் எனவும் அறிவிக்கப்பட்டுள்ளது.
இந்த பரிந்துரைகள் தொழிலாளர் நலனில் எவ்வாறு தாக்கம் ஏற்படுத்தும் என்பது குறித்து பெரும் விவாதங்கள் எழுந்துள்ளன. பொதுமக்கள் கருத்துகளில் அரசுப் பணியாளர்களுக்கும் இதே விதிகள் பொருந்த வேண்டுமே என்ற கேள்வி முன்வைக்கப்பட்டுள்ளது. சிலர் வேலை நேரம் அதிகரித்தால் வேலை வாய்ப்புகள் குறையும் என அச்சம் தெரிவித்துள்ளனர். மற்றொரு புறம், சீனாவில் போல அதிக உழைப்பால் பொருளாதார வலிமை அதிகரிக்கும் என சிலர் ஆதரவு தெரிவித்துள்ளனர்.
இதே சமயம், நீண்ட வேலை நேரம் மக்கள் வாழ்க்கையை சிரமப்படுத்தும் என்று எதிர்ப்பும் எழுந்துள்ளது. வேலை மற்றும் தனிப்பட்ட வாழ்க்கைக்கு இடையில் சமநிலையை பேணுவது மிக முக்கியம் என்பதால், அரசு எடுக்கும் இறுதி முடிவு தொழிலாளர் நலனும் தொழில் நிறுவனங்களின் வளர்ச்சியும் கருத்தில் கொண்டு எடுக்கப்படும் என எதிர்பார்க்கப்படுகிறது.
