இந்திய அரசியலமைப்புச் சட்டம் ஏற்கப்பட்டு 75 ஆண்டுகள் நிறைவடைந்ததை முன்னிட்டு மக்களவையில் நேற்று சிறப்பு விவாதம் நடைபெற்றது. விவாதத்தை தொடங்கி வைத்து பாதுகாப்பு அமைச்சர் ராஜ்நாத் சிங் பேசியதாவது:- அரசியலமைப்பு உருவாக்கும் செயல்முறையை அபகரிக்க ஒரு கட்சி எப்போதும் முயற்சித்து வருகிறது. இந்திய அரசியலமைப்பின் வரலாறு தொடர்பான இவை அனைத்தும் மக்களிடமிருந்து மறைக்கப்பட்டுள்ளன.
அவர்கள் (ராகுல் காந்தி உள்ளிட்ட காங்கிரஸ் கட்சியினர்) அரசியல் சட்டத்தை தங்கள் சட்டைப் பையில் வைத்துள்ளனர். ஆனால் பாஜக தலைவர்கள் அதை தங்கள் இதயத்தில் சுமந்துள்ளனர். காங்கிரஸைப் போல அரசியல் ஆதாயத்திற்கான கருவியாக நாங்கள் அரசியல் சாசனத்தைப் பயன்படுத்தியதில்லை. நாங்கள் அரசியலமைப்பு சட்டத்தின்படி வாழ்ந்தோம். அரசமைப்புச் சட்டத்துக்கு எதிரான சதிகளை விழிப்புடனும் உண்மையான வீர உணர்வுடனும் எதிர்கொண்டோம்.
அதனை பாதுகாப்பதில் பெரும் சிரமங்களை எதிர்கொண்டுள்ளோம். 1976-ல் இந்திரா காந்தி அரசு விதித்த நெருக்கடி நிலையின் போது, அப்போதைய உச்ச நீதிமன்ற நீதிபதி எச்.ஆர்.கன்னா, தனது மாறுபட்ட தீர்ப்பால் தலைமை நீதிபதி பதவியை இழக்க நேரிட்டது. ஒரு சர்வாதிகார அரசாங்கத்தின் அதிகாரங்களை அரசியலமைப்பு வரம்புகளுக்குள் மட்டுப்படுத்த முயற்சித்ததற்காக நீதிபதிகள் பெரும் விலை கொடுக்க வேண்டியிருந்தது.
1973-ல் அப்போதைய காங்கிரஸ் அரசு, அரசியல் சாசன விழுமியங்களைப் புறக்கணித்து, நீதிபதிகள் ஜே.எம்.ஷெலட், கே.எஸ். ஹெக்டே மற்றும் ஏ.என். குரோவர் மற்றும் நான்காவது மூத்த நீதிபதியாக இந்தியாவின் தலைமை நீதிபதியாக நியமிக்கப்பட்டார். இவ்வாறு ராஜ்நாத் சிங் கூறினார்.
