அகமதாபாத்: குஜராத்தின் அகமதாபாத்தில் இருந்து 242 பேருடன் புறப்பட்ட ஏர் இந்தியா விமானம், புறப்பட்ட சில நிமிடங்களில் விபத்துக்குள்ளாகி தீப்பிடித்தது. நேற்று நடந்த இந்த பயங்கர விபத்தில் குஜராத் முன்னாள் முதல்வர் விஜய் ரூபானி உட்பட விமானத்தில் இருந்த 241 பேரும் உயிரிழந்தனர். விமானம் ஒரு மருத்துவக் கல்லூரி விடுதியில் மோதியதில் 10 மருத்துவ மாணவர்களும் கொல்லப்பட்டனர். காரணம் என்ன? – விபத்து குறித்து அகமதாபாத் விமான நிலைய வட்டாரங்கள் கூறியதாவது:-
“விமான நிலைய ஓடுபாதையில் ஏர் இந்தியா விமானம் சரியான வேகத்தில் இயங்கி வந்தது. ஆனால் தரையிலிருந்து பறக்கத் தொடங்கிய பிறகு, அது போதுமான உயரத்திற்கு மேல் உயரவில்லை. அடுத்த 2 நிமிடங்களில் விமானம் கீழே விழுந்து விபத்துக்குள்ளானது. பயங்கர வேகத்தில் விழும்போது அது தீப்பிடித்தது. தரையிறங்கும் கியர் கோளாறு காரணமாக, விமான சக்கரம் ஒரு கட்டிடத்தில் மோதியிருக்கலாம். பறவைகள் விமான இயந்திரத்தில் மோதியிருக்கலாம். விமான இயந்திரத்தில் திடீரென கோளாறு ஏற்பட்டிருக்கலாம். இதுபோன்ற காரணங்களால் விபத்து ஏற்பட்டிருக்கலாம்.
விமானத்தின் கருப்புப் பெட்டி மீட்கப்பட்டுள்ளது. அதை ஆராய வேண்டும். விபத்து குறித்து முழுமையான விசாரணை நடத்தப்பட வேண்டும். அதன் பிறகுதான் விபத்துக்கான உண்மையான காரணம் தெரியவரும்,” என்று வட்டாரங்கள் தெரிவித்தன. விமானத்தின் வால் பகுதியில் கருப்புப் பெட்டி பொருத்தப்பட்டுள்ளது. விமானிகள் மற்றும் ஊழியர்களின் அனைத்து உரையாடல்களும் இதில் பதிவு செய்யப்பட்டுள்ளன. வேகம், பறக்கும் உயரம், திசை மற்றும் வானிலை உள்ளிட்ட தகவல்களும் பதிவு செய்யப்படுகின்றன.
ஒரு பெரிய தீ விபத்து ஏற்பட்டு கடலில் மூழ்கினாலும், கருப்புப் பெட்டி சேதமடையாது. விபத்துக்குள்ளான விமானத்தின் கருப்புப் பெட்டி மீட்கப்பட்டு ஆய்வகத்திற்கு அனுப்பப்பட்டுள்ளது. அதை பகுப்பாய்வு செய்து அதில் பதிவு செய்யப்பட்ட தகவல்களைப் பெற 15 நாட்கள் வரை ஆகும். இதற்குப் பிறகுதான் விபத்துக்கான உண்மையான காரணம் தெரியவரும் என்று விமான அதிகாரிகள் தெரிவித்தனர். இந்திய அதிகாரிகள் கோரினால் விபத்து தொடர்பான விசாரணையில் உதவ அமெரிக்கா தயாராக உள்ளது என்று அமெரிக்க மத்திய விமானப் போக்குவரத்து நிர்வாகம் (FAA) தெரிவித்துள்ளது.
